Приморе губернатори муҳожирларга нисбатан қаттиқ чоралар кўришни буюрди

Приморье губернатори Олег Кожемяко минтақадаги муҳожирларга нисбатан қаттиқ чоралар кўриш тўғрисида фармон чиқарди. У ҳуқуқ-тартибот идораларини ноқонуний миграцияга қарши курашишга чақирди.

Ҳуқуқ-тартиботни таъминлашга бағишланган мувофиқлаштирувчи йиғилишда вилоят раҳбари миграция назорати чораларини кучайтириш зарурлигини таъкидлаган. Унинг фикрича, мавжуд вазият жиддий ўзгаришларни, жумладан, миграция жараёнларини қаттиқ назорат қилишни талаб қилади.

Ҳуқуқни муҳофаза қилувчи органлар ва бошқа идоралар раҳбарлари бу борадаги ишларни бошлаб юборган. Жорий йилда 13 мингдан ортиқ ҳуқуқбузарликлар қайд этилган, мингдан ортиқ муҳожир вилоятдан чиқариб юборилган, 1,5 мингга яқин хорижликларнинг Россияга кириши тақиқланган.

Губернатор мигрантларни рўйхатга олиш тартиб-қоидаларини кўриб чиқиш ва жараённи рақамлаштиришни талаб қилмоқда. Чет элликлар учун ишлаш учун рухсатномалар ҳам қаттиқ назоратга олиниши керак.

Шунингдек, такси ва жамоат транспортида ноқонуний ҳайдовчиларга қарши курашиш ҳам вазифалардан бири бўлди. 100 га яқин ҳайдовчи аллақачон жавобгарликка тортилиб, машиналари жарима майдончаларига қўйилган.

Вилоятга келаётган чет эл фуқароларини ҳарбий рўйхатга олиш масаласига алоҳида эътибор қаратилади. Шунингдек, мигрантларнинг рус тилини билиш даражасини баҳолаш режалаштирилган.

Губернатор Приморье аҳоли сонининг кўпайишидан манфаатдор эканини, лекин минтақанинг иқтисодий ҳаётида иштирок этмаётган ноқонуний муҳожирлар ҳисобига эмаслигини таъкидлайди.