Путин Россия армиясида хизмат қилаётган хорижликларга фуқаролик бериш ҳақидаги фармонни имзолади

Россия президенти Владимир Путин Россия Қуролли Кучлари ёки бошқа ҳарбий тузилмаларида ҳарбий хизматни ўташ учун шартнома тузган хорижликларнинг соддалаштирилган тартибда Россия фуқаролигини олиш имкониятини берувчи фармонни имзолади. Шунингдек, уларнинг оила аъзолари ҳам фуқароликни олиш учун ариза топширишлари мумкин бўлади.

Ҳужжатга кўра, Украинадаги махсус операция давомида соғлиғи сабабли Россия армияси сафида ҳарбий хизматдан бўшатилган хорижликлар, ёш чегарасига етганда, шартнома муддати тугаганидан сўнг, шунингдек, ҳарбий хизматни тугатганлиги муносабати билан Россия фуқаролигини олиш учун ариза бериши мумкин.

Украинада махсус операция бошланишидан олдин Мудофаа вазирлиги билан хорижликлар учун шартноманинг минимал муддати беш йил эди. Россия фуқаролигини олиш учун уч йил хизмат қилиш керак эди. Бу муддатни бир йилга қисқартирувчи тузатишлар 2022 йил сентябр ойида қабул қилинган. Май ойида Владимир Путин махсус операцияда қатнашган хорижликларга фуқароликни олишнинг соддалаштирилган тартиби тўғрисидаги қонунни имзолаган эди.

Бундан ташқари, Владимир Путин яна бир фармонни имзолади, унга кўра, 2014 йил 18 мартгача Қрим ёки Севастополда туғилган ва доимий истиқомат қилган Украина фуқаролари Россия фуқаролигини олиш учун ариза бериш ҳуқуқига эга. Бундан ташқари, фармонда қайд этилишича, РСФСР ҳудудида туғилган, аввал СССР фуқаролигига эга бўлган Украина, Ироқ, Сурия, Афғонистон ва Яман фуқаролари Россия фуқаролигини соддалаштирилган тартибда (рус тилини, Россия тарихини ва унинг асослари қонунчилигини билмасдан, шунингдек, беш йил давомида Россия ҳудудида олдиндан истиқомат қилмасдан) олишлари мумкин.

Ўтган йилнинг декабр ойи ўрталарида Владимир Путин Беларус, Қозоғистон ва Молдова фуқаролари учун Россия фуқаролигини қабул қилиш жараёнини соддалаштирувчи фармонни имзолади. 2023 йил 22 ноябрда Россия президенти Россия фуқаролиги масалаларини кўриб чиқиш ва фуқаронинг қасамёд қилиш тартиби тўғрисидаги янги қоидаларни тасдиқловчи фармонни ҳам имзолади.