Qirg’iziston migrantlarning tibbiy sug’urtasi bo’yicha Rossiyani sudga berdi

Qirg’iziston migrantlarning tibbiy sug’urtasi bo’yicha Rossiyani sudga berdi

Qirg’iziston Rossiyadagi migrantlarning tibbiy sug’urtasi masalasi bo’yicha Yevroosiyo iqtisodiy ittifoqi (YEOII) sudiga da’vo arizasi bilan murojaat qildi.

Qirg’iziston rasmiylarining so’zlariga ko’ra, Rossiya hukumati migrant ishchilarning oila a’zolariga majburiy tibbiy sug’urta (ОМС) polislarini bermayapti. Qirg’iziston tomoni bu YEOII mamlakatlari o’rtasidagi mavjud kelishuvlarni buzadi, deb hisoblaydi.

Qirg’iziston Majburiy tibbiy sug’urta jamg’armasi rahbari Azamat Mukanov parlamentda mamlakat ushbu vaziyat bo’yicha YEOII sudiga da’vo arizasi bilan murojaat qilganini e’lon qildi. Ish bo’yicha qaror taxminan ikki hafta ichida kutilmoqda.

Avvalroq Samara viloyatida xorijiy fuqarolar uchun yangi cheklovlar joriy etilgan edi. Ularga bolalar bog’chalari va maktablarda farrosh bo’lib ishlash taqiqlangan. Shunga o’xshash cheklovlar jamoat transportida ishlashga ham tegishli. Bundan tashqari, ushbu mintaqadagi migrantlar dron va kosmik texnologiyalar ishlab chiqarish sohalaridagi ishlarga yollanmaydi.

Shuningdek, Rossiya Ichki ishlar vazirligi migrant ishchilardan daromad ma’lumotlarini avtomatik ravishda olishni boshlashi haqida xabar berilgan edi. Ma’lumotlar soliq xizmatidan yig’iladi. Maqsad chet elliklarning ishga joylashishi ustidan nazoratni kuchaytirish va soxta ishga joylashish holatlarini aniqlashdir. Bu jarayonda Moliya vazirligi, Federal Soliq xizmati, Ichki ishlar vazirligi, Tashqi ishlar vazirligi va Moskva hukumati ishtirok etmoqda.

Majburiy tibbiy sug’urta polisi nima va Rossiyada kim unga ega bo’lishi mumkin?

Majburiy tibbiy sug’urta polisi – bu sizga Rossiyadagi davlat klinikalari va kasalxonalarida bepul tibbiy yordam olish huquqini beruvchi hujjat. Ushbu polis sizga shifokorga ko’rinish, davolanish va tekshiruvlardan pul to’lamasdan o’tish imkonini beradi.

Rossiyada majburiy tibbiy sug’urta polislari (ОМС) odatda Rossiya fuqarolariga beriladi. Chet elliklarning ayrim toifalari, jumladan, agar ular rasman mehnat shartnomasi bo’yicha ishlayotgan bo’lsa, YeOII mamlakatlaridan (masalan, Qirg’iziston, Qozog’iston, Armaniston va Belarus) kelgan migrant ishchilar, shuningdek, «ВНЖ» yoki «РВП»ga ega bo’lgan chet elliklar bunday polislardan foydalanish huquqiga ega.

Biroq, ularning oila a’zolari – turmush o’rtoqlari va bolalari – ko’pincha bunday polislarni avtomatik ravishda olmaydi. Norozilikning sababi shu: Qirg’iziston migrant ishchilarning oilalari ham majburiy tibbiy sug’urta olish huquqiga ega bo’lishi kerak, deb hisoblaydi.

YeOIIdan tashqaridagi mamlakatlardan kelgan migrantlar odatda majburiy tibbiy sug’urta olmaydi. Ular pullik tibbiy sug’urta (ДМС) sotib olishlari yoki davolanishlari uchun o’zlari to’lashlari kerak.