Qozog‘istonda mehnat migrantlari orasida Xitoy fuqarolari soni eng ko‘p

Qozog‘iston Respublikasi Mehnat va aholini ijtimoiy himoya qilish vazirligi ma’lumotlariga tayanib, «KazTag» agentligi xabariga ko‘ra, mamlakatda faoliyat yuritayotgan mehnat migrantlari soni bo‘yicha Xitoy birinchi o‘ringa chiqdi.

Rasmiy statistikaga ko‘ra, hozirda Qozog‘istonda 5330 nafar xitoylik ishchi mehnat qilmoqda. Ikkinchi o‘rinda — O‘zbekiston fuqarolari (2682 kishi). Keyingi o‘rinlarda Turkiya (1046 kishi) va Hindiston (1012 kishi) turibdi.

Vazirlikning qayd etishicha, 2025-yil 1-oktyabr holatiga mahalliy ijro organlaridan ruxsatnoma olgan holda Qozog‘iston hududida 14666 nafar xorijlik mehnat faoliyati bilan shug‘ullanmoqda. Hozirda mamlakatda 1896 ta ish beruvchi xorijiy ishchi kuchidan foydalanmoqda.

Eng ko‘p ishchi jalb qilingan sohalar:

qurilish — 4799 kishi

qishloq, o‘rmon va baliq xo‘jaligi — 3065 kishi

konchilik va karyerlarni ishga solish — 1187 kishi

qayta ishlash sanoati — 1085 kishi

2025-yil uchun xorijiy ishchilar ko‘chirib kelishi bo‘yicha umumiy kvota 14,8 ming nafar etib belgilangan edi. Joriy yil mart oyida mahalliy hokimliklar so‘roviga ko‘ra bu raqam 16,5 minggacha, avgustdan boshlab esa mavsumiy kasblar ro‘yxati kengaytirilishi munosabati bilan 19,4 ming o‘ringacha oshirildi.