Qurilishdagi berkinmachoq: politsiyadan yashiringan migrantlar

Sankt-Peterburg politsiyasi Vasileostrovskiy tumanidagi turar joy majmuasi qurilishida tekshiruv oʻtkazdi. Ushbu reyd davomida xodimlar yuzga yaqin muhojir ishchining hujjatlarini tekshirdi. Bir nechta quruvchi chala bitgan yuqori qavatga yashirinishga harakat qilib, yoʻlakni beton plita bilan yopib qoʻyishdi. Ammo politsiyadan yashirinishning iloji boʻlmadi, shu bois ishchilar pastga tushib, hujjatlarini koʻrsatishga majbur boʻlishdi.

Tekshiruv natijalariga koʻra, 12 migrant zarur hujjatlarsiz ishlayotgani ma’lum boʻldi. Ularga nisbatan noqonuniy mehnat faoliyati uchun RF Ma’muriy huquqbuzarliklar toʻgʻrisidagi kodeksining tegishli moddasi boʻyicha ma’muriy materiallar rasmiylashtirildi. Sud ularga jarima va undan keyin Rossiya hududidan chiqarib yuborish jazosini tayinladi. Endilikda ish beruvchini xorij fuqarolarini noqonuniy yollash boʻyicha javobgarlikka tortish masalasi hal qilinmoqda. Politsiyada bunday tekshiruvlar muntazam ravishda oʻtkazib turilishi eslatib oʻtildi.

Avvalroq, iyun oyida xuddi shunday reyd Pravda koʻchasidagi kapital ta’mirlanayotgan uyda boʻlib oʻtgan edi. U yerda jami 80 kishi tekshirilib, ulardan 59 nafari qurilish va ta’mirlash ishlarida band boʻlgan xorij fuqarolari boʻlib chiqdi. Ayrim ishchilar tekshiruv boshlangunga qadar qochishga urinib, derazalardan sakrashgan, qurilish havozalari orqali pastga tushishgan va yertoʻlalarda yashirinishgan, biroq ularning barchasi qoʻlga olingan edi.

Yil boshidan buyon Sankt-Peterburg sud pristavlari Rossiyadan 4050 nafar chet ellik va fuqaroligi boʻlmagan shaxsni majburiy ravishda chiqarib yubordi. Noqonuniy ishchilarning aksariyati Oʻzbekiston va Tojikiston fuqarolari orasida ekanligi ma’lum boʻldi. Shuningdek, chiqarib yuborilganlar orasida Ozarbayjon, Pokiston, Nigeriya, Livan, Iordaniya, Sudan va Braziliya fuqarolari ham bor edi.