Reyestriga asossiz tushib qolgan muhojirlarni undan chiqara boshlashdi

Migrant.uz nazorat ostidagi shaxslar reyestriga asossiz tushib qolgan va undan o’z ma’lumotlarini chiqarishga erishgan muhojirlar bilan suhbatlashdi.

“ВНЖ”ga ega Shahnoza M. T-bank ilovasida pullari muzlatilganidan keyingina reyestrga tushib qolganidan xabar topdi. Shahnoza M. “ВНЖ”ga ega bo’lgani uchun avval o’zini doimiy yashash uchun ruxsatnoma bo’yicha reyestrdа tekshirganida ma’lumotlari chiqmaganini aytadi. Biroq O’zbekiston fuqarosi pasporti bo’yicha tekshirganida esa rostdan ham reyestrda ekanligini ko‘rgan. Shahnoza M. malakali kardiolоg shifokor. Shu uchun ishdan chiqib, IIB(ОВМ ОМВД)ga bora olishi muammoligi sababli ish beruvchisidan yordam so’rashga qaror qildi. O’zbekistonlik ayol o‘zi ishlaydigan tibbiyot klinikasi rahbariyatiga muammosini aytganidan keyin, ish beruvchi Shahnozaning reyestrga tushishi sabablarini aniqlash uchun hududiy Migratsiya bo‘limiga o’z yuristini yuborgan.

“Yurist bo’limga borib kelganining ertasi kuni ma’lumotlarimni tekshirsam reyestrdan o‘chirildi. Juda oson bitdi, Xudoga shukur. Men hech narsa qilmadim, faqat asabiylashdim, kechqurun meni hamkasblarim uyga olib borishdi, chunki taksi chaqira olmadim, pullar muzlatilgan edi”, – deb tan oladi Shahnoza.

Latif Hamidov Sibirda oshpaz bo’lib ishlaydi. Qiziqish uchun reyestrdagi ma’lumotlarini tekshirishga qaror qildi va hayrat bilan o’zini nazorat ostidagi shaxslar reyestrida ko’rdi. Shundan so’ng vahimaga tushib, ishni tashlab, ro’yxatdan o’tgan joyi bo’yicha “ОВМ ОМВД”ga bordi. Latif Rossiyada 7 yildan beri ishlab keladi va hech qachon hujjatlarsiz yurmagan. Bugun ertalab Latif reyestrdan chiqqanini bilganida yengil tortganini aytmoqda. O’zbekistonlik muhojir uzoq kutilgan «nazorat qilinadigan shaxslar reyestrida mavjud emas» yozuvini ko’rish umidida ro’yxatdan chiqarilguniga qadar deyarli har soatda o’z ma’lumotlarini reyestrda tekshirib turganini bildirdi.

– Deyarli ikki soat yo‘l yurdim. “FMS” bizdan uzoq-da!Borib, hamma hujjatlarimni ko‘rsatdim, reyestrdan chiqaringlar, deb aytdim. Ariza yozib, janjal qilishga hojat bo‘lmadi. Hujjatlarni ko‘rdi-da, patent, registratsiya va pasportni kopiya qilib olib qoldi, keyin ketaver, chiqarib qo‘yamiz deyishdi. Har soatda tekshirib turdim o‘zim ham. Ertalab turib tekshirsam, reyestrdan chiqarishibdi, shukr”, deya tajribasi bilan bo‘lishdi Latif Hamidov.

Abdurahmon U. Rossiyada uch yildan buyon ishlaydi. Oxirgi ikki yil oson bo’lmagani uchun, qiyinchiliklarga moslashib ketganini aytmoqda.

– O’tgan yili meni noqonuniy tarzda chiqarib yuborishdi. Yuristlar yordamida apellyatsiya instantsiyasida deportni bekor qildim. Ammo qaror bekor qilinganidan keyin hujjatlar bilan bog’liq qiyinchiliklar tugamadi. Avval Rossiyaga zo’rg’a kiritishdi, chegarada taxminan besh soat tekshirishdi. Keyin migratsiya qaydiga turishim qiyin bo’ldi. Uzoq vaqt yugurdim, hamma joyda sud qarorini ko’rsatdim. Amallab ro’yxatdan o’tdim, – deydi suhbatdoshimiz.

– Reyestr chiqqani Migrant.uzda e’lon qilinganida negadir bu reyestrdа mening ma’lumotlarim bo’lishini sezgandim. Shunday bo‘lib chiqdi ham. Ma’lumotlarim reyestrdа borligini ko’rgach, registratsiya qilib bergan politsiya bo’limiga uy egasi bilan bordim. Yana sud qarorini ko’rsatdik. Hujjatlarim bilan inspektor ichkariga kirib ketdi-da, 2 daqiqada qaytib chiqib, hujjatlarimni berdi. Ketaveringlar, deganiga uyga qaytdik. Taxminan 5 soatdan so’ng reyestrni tekshirsam, ma’lumotlarim yo’q edi. Tezdagina chiqarib yuborishibdi. Shuning uchun hammaga ro’yxatdan o’tgan joyingizga borishni, hujjatlarni ko’rsatib, reyestrdan o’zingizni o’chirishni maslahat beraman.

Migrant.uz reyestrgа noto’g’ri tushib qolgan 10 dan ortiq muhojir bilan suhbatlashdi. Ushbu maqola e’lon qilingan paytida ularning barchasi o’zlarini reyestrdan muvaffaqiyatli chiqarib bo‘lishgan. Har bir suhbatdoshimiz Rossiya IIVga borganida hujjatlarini tekshirishda qo’shimcha savollar bo’lmaganini ta’kidladi. Shu munosabat bilan, qonuniy asoslarga ega bo’lishiga qaramay, nazorat ostidagi shaxslar reyestriga tushib qolgan barcha muhojirlarga registratsiya manzili bo‘yicha “ОВМ ОМВД”ga murojaat qilish tavsiya etiladi.