Rossiya fuqaroligini olish uchun migrant bolalar 14 yoshda qasamyod qiladi

2026-yil 9-yanvardan boshlab Rossiyada xorijiy o’smirlar uchun fuqarolikni olish qoidalari o’zgartirildi. Endi 14 yosh va undan katta bo’lgan barcha chet elliklar Rossiya fuqaroligini olish uchun qasamyod qilishlari shart. Bu haqda Rossiya Ichki ishlar vazirligining Migratsiya xizmati e’lon qildi. Ilgari bu qasamyodni faqat kattalar qabul qilishlari shart edi; endi bu qoida o’smirlarga ham tegishli.

Agar fuqarolik berilgan shaxs qasamyod qilishdan bosh tortsa, fuqarolikni berish to’g’risidagi qaror bekor qilinadi. Ular qasamyod qilish uchun bir yilgacha muddat beriladi. Agar qasamyod shu vaqt ichida qabul qilinmasa, ularning fuqaroligi ham bekor qilinadi, bu dastlabki qaror qabul qilingan kundan boshlab kuchga kiradi.

Qasamyod soddalashtirilgan yoki umumiy tartib orqali Rossiya fuqaroligini olgan har bir kishi uchun majburiydir. Qasamyod hamma uchun bir xil va 2017-yildan beri o’zgarmagan. Unda shaxs Rossiya Konstitutsiyasi va qonunlariga rioya qilishga, fuqarolarning huquq va erkinliklarini hurmat qilishga, o’z burchlarini bajarishga, mamlakatga sodiq bo’lishga, uning madaniyati, tarixi va an’analarini hurmat qilishga qasamyod qiladi.

Tartib quyidagicha: shaxs qasamyodni Rossiya bayrog’i oldida Ichki ishlar vazirligining komissiyasi ishtirokida ovoz chiqarib o’qishi va maxsus qog‘ozga imzo chekishi kerak. Bu odatda fuqarolikni berish to’g’risidagi qaror qabul qilinganidan keyin 60 kun ichida amalga oshirilishi lozim.

Ushbu qoida 2026-yil 9-yanvardan boshlab Rossiya fuqaroligini olgan 14 yosh va undan katta bo’lgan barcha chet elliklarga nisbatan qo’llaniladi.

Ushbu qoida o’smirlarning 14 yoshdan boshlab davlatga sodiqligi va integratsiyasini qonuniy ravishda mustahkamlash uchun kiritilgan: bola pasportni olib, qasamyodini qabul qilganda, ular barcha majburiyatlari bilan to’laqonli fuqaroga aylanadi — jinoyat qonunchiligi, harbiy ro’yxatga olish kabi talablariga bo’ysunadi. Davlat nazoratida bo‘lgan o‘smir chaqiruv boshlangan 18 yoshga to’lmasdan oldin «yo’qolib qolishining» oldi olinadi.