Rossiya migrantlar uchun “medosmotr” qoidalarini kuchaytirmoqda

Davlat Dumasi migrantlar uchun tibbiy ko’rik qoidalarini o’zgartiruvchi qonun loyihalarini qo’llab-quvvatladi. Bu haqda Sog’liqni saqlash qo’mitasi rahbari Sergey Leonov ma’lum qildi.

Endi Rossiyaga 90 kundan ortiq vaqtga kelgan chet elliklar kirishdan keyin 30 kun ichida majburiy tibbiy ko’rikdan o’tishlari shart bo’ladi. Ilgari ularga buni amalga oshirish uchun 90 kun muddat berilgan edi.

Tekshiruv natijalari haqidagi ma’lumotlar yagona sog’liqni saqlash tizimiga, shuningdek, Ichki ishlar vazirligi va Rospotrebnadzorga yuboriladi.

Agar muhojirda xavfli yuqumli kasalliklar aniqlansa, u Rossiyadan deportatsiya qilinishi mumkin. Tibbiy ma’lumotnomalarni soxtalashtirish jinoyat hisoblanadi va sakkiz yilgacha qamoq bilan jazolanadi.

Shuningdek, 28-yanvarda Ichki ishlar vazirligi va ta’lim tizimi o’rtasida axborot almashishning yangi tartibi kuchga kirdi. Endi agentliklar maktab va kollejlarda o’qiyotgan chet el fuqarolarining farzandlari haqida muntazam ravishda ma’lumotlar almashib turadi.