Rossiya migrantlarga «suyunchi puli»ni bekor qilmoqchi

Rossiya Milliy korrupsiyaga qarshi kurash qo‘mitasi rahbari Kirill Kabanov mamlakat rahbariyati uchun Rossiyada bola tug‘ilishi uchun migrantlarga ijtimoiy to‘lovlarni bekor qilishni taklif qiluvchi hisobot tayyorlanayotganini e’lon qildi.

Uning so‘zlariga ko‘ra, ba’zi chet elliklar, ayniqsa Markaziy Osiyo mamlakatlaridan Rossiyaga tug‘ish va nafaqalar olish uchun ataylab kelishar ekan. Kabanov bu Rossiya ijtimoiy dasturlaridan foyda olish usuliga aylanib borayotganini iddao qilgan.

2024-yil 1-yanvardan boshlab kuchaytirilgan qoidalar bo‘yicha faqat ona va bola tug‘ilgan paytda Rossiya fuqaroligiga ega bo‘lgan oilalargina federal tug‘ruq kapitalini olishi mumkin. Ilgari boshqa chet elliklar ham to‘lovlarni olishlari mumkin edi. Demograflarning fikriga ko‘ra, 2023-yilda Rossiyada chet ellik ayollar taxminan 50 000–51 000 bola tuqqan, bu mamlakatdagi tug‘ilishlarning umumiy sonining taxminan 4% ni tashkil qiladi.

Shuni ta’kidlash kerakki, migrantlar, Kabanovning iddaosicha, tug‘ish uchun Rossiyaga kelsa, rossiyalik ayollar ham Argentina, AQSH, Chili, Kanada va boshqa mamlakatlarga bola tug‘ish uchun yo‘l olishadi.