Rossiya va Tojikiston o‘rtasida mehnat migrantlari bo‘yicha yangi kelishuv imzolandi

9-oktyabr kuni Dushanbeda bo‘lib o‘tgan uchrashuvda Rossiya prezidenti Vladimir Putin va Tojikiston prezidenti Emomali Raxmon mehnat muhojirlari bo‘yicha bir necha muhim hujjatlarga imzo chekdi.

Yangi kelishuvga ko‘ra, Tojikiston fuqarolari Rossiyaga ishlash uchun kirishdan oldin tibbiy ko‘rikdan o‘tishi shart bo‘ladi. Shuningdek, 2019-yilda tuzilgan Tojikiston fuqarolarini vaqtincha ishga jalb etish haqidagi hukumatlararo bitimga o‘zgartishlar kiritildi.

Bundan tashqari, ikki davlat migratsiya masalalari bilan shug‘ullanuvchi idoralar faoliyatini muvofiqlashtirish bo‘yicha ham yangi kelishuv tuzdi.

Putin muzokaralar paytida hozirda Rossiyada 1 milliondan ortiq tojikistonlik ishlab yurgani haqida gapirdi. Ular qurilish, uy-joy xo‘jaligi, transport va logistika sohalarida mehnat qilib, Rossiya iqtisodiga katta hissa qo‘shayotganini ta’kidladi.

Putin 8-oktyabr kuni davlat tashrifi bilan Tojikistonga kelgan, uning safari uch kun davom etadi.

Rossiya iqtisodiy rivojlanish vaziri Maksim Reshetnikov sentyabr oyida mamlakat “qaytish migratsiyasi” tizimiga o‘tayotganini aytgan. Uning so‘zlariga ko‘ra, mehnat muhojirlari kelib, ishlab, pul topib, keyin yurtiga qaytishi to‘g‘ri yo‘l hisoblanadi.

Shu bilan birga, Rossiya prezidentining matbuot kotibi Dmitriy Peskov 2024-yilda Rossiya aholi soni kamayib borayotgan bir paytda chet ellik ishchi kuchiga muhtoj ekanini aytgan edi. Lekin so‘rovlar shuni ko‘rsatmoqdaki, rossiyaliklarning taxminan 80 foizi mehnat muhojirlari ko‘payganidan norozi.

Yangi kelishuvlar, rasmiylarning so‘zlariga ko‘ra, mehnat muhojirlari uchun qonuniy ishlash va tibbiy xavfsizlikni ta’minlashga yordam beradi.