Rossiyada 2026-yildan boshlab migrantlar uchun yangi cheklovlar joriy etiladi

Rossiyada 2026-yildan boshlab migrant ishchilar uchun yangi qoidalar kuchga kiradi. Tegishli farmonni Bosh vazir Mixail Mishustin imzoladi.

Yangi qoidalarga ko’ra, migrantlarga alkogol va tamaki savdosida ishlash taqiqlanadi. Chet elliklarning bozorlarda, ko’chma chakana savdo do’konlarida va dori-darmon sotadigan dorixonalarda ishlashiga qo’yilgan taqiq ham o’z kuchida qoladi.

Bir qator sanoat tarmoqlarida migrantlar ulushiga cheklovlar o’rnatildi. Yo’lovchi va yuk tashishda chet elliklarga ishchi kuchining 24% dan ko’p bo’lmagan qismini tashkil etishga ruxsat beriladi. Qurilishda bu cheklov 80% dan 50% gacha qisqartirildi. Sabzavotchilikda, shuningdek, o’rmonchilik va yog’ochni qayta ishlash sanoatida migrantlar ulushi 50% dan 40% gacha qisqartirildi.

Agar kompaniya migrantlarning belgilangan foizidan ko’proq qismini ish bilan ta’minlasa, ish beruvchi ularning ba’zi mehnat shartnomalarini bekor qilishi shart bo’ladi. Ushbu cheklovlarni buzganlik uchun jarima solinadi: menejerlar uchun 45 000 dan 50 000 rublgacha; kompaniyalar uchun 800 000 dan 1 million rublgacha yoki 90 kungacha ish to’xtatib turiladi.

Shunga o’xshash cheklovlar allaqachon bir qator mintaqalarda amal qilmoqda. Ulyanovsk viloyatida chet elliklarga alkogol va tamaki sotuvchisi, avtobus va taksi haydovchisi sifatida ishlash taqiqlangan.
Chelyabinsk viloyatida migrantlarga chakana savdo, ovqatlanish xizmati, mehmonxona biznesi, transport va boshqa bir qator sohalarda ishlash man etigan. Orenburg viloyatida 2026-yildan boshlab yo’lovchi tashish, taksi va ta’lim sohasida ishlash mumkin bo‘lmaydi. Tula va Kaluga viloyatlarida taqiqlangan sohalar ro’yxati ham kengaytirildi.

Shu bilan birga, mintaqaviy hokimiyat ma’lumotlariga ko’ra, migrantlarga qurilish, ishlab chiqarish, qishloq xo’jaligi, mehmonxonalar va ovqatlanish xizmati sanoatida talab yuqori bo’lib qolmoqda.