Rossiyada biometrik ma’lumotlari yo‘q migrantlar asta-sekin mobil aloqadan uziladi

Rossiya Yagona biometrik tizimda ro‘yxatdan o‘tmagan migrantlar uchun aloqa xizmatlarini cheklashni boshladi. Rossiyada muhojirlarning katta qismi Ukraina, O‘zbekiston va Tojikiston fuqarolaridir. Ularga biometrik ma’lumotlarni taqdim etgan taqdirdagina 10 tagacha SIM-karta olishga ruxsat berilgan. Eski shartnomalar uchun muddat 2025-yil 1-iyulda tugaydi. Endi qoidabuzarlar Rossiyada xizmatlarning bosqichma-bosqich bloklanishiga duch kelishadi.

Butunlay nofaol raqamlar zudlik bilan uziladi, qolganlari uchun birinchi navbatda xalqaro qo‘ng‘iroqlar va internet cheklanadi.

Biometrik ma’lumotlar – bu odamni o‘ziga xos biometrik xususiyatlariga ko‘ra aniqlash usuli. Har bir insonning ovozi, yuz xususiyatlari, ko‘z rangi yoki kaftlaridagi chiziqlar o‘ziga xos bo‘ladi.

Uch oydan ortiq vaqt davomida, ya’ni 2025-yil aprelidan beri faol bo‘lmagan raqamlar darhol o‘chiriladi. Faol raqamlar uchun birinchi navbatda xalqaro va shaharlararo aloqa cheklanadi, internet tezligi pasayadi va 30 kundan keyin ular butunlay uziladi. Shu vaqt ichida siz mobil raqamingizni yo‘qotmaslik uchun shartnomani yangilashingiz mumkin.