Rossiyada migrant bolalar uchun rus tilidan testda dastlabki ballar belgilandi

Ta’lim va fan sohasidagi nazorat bo‘yicha Federal xizmat migrant bolalar uchun rus tilidan test natijalarini baholash mezonlarini ishlab chiqdi. Bu haqda TASS xabar bermoqda.

Testdan muvaffaqiyatli o‘tish uchun uch ball to‘plash lozim, bu an’anaviy besh ballik shkala bo‘yicha «uch» bahosiga teng. Shu bilan birga, dastlabki ballar miqdori va tayyorgarlik darajasi o‘rtasida muvofiqlik belgilandi. Masalan, birinchi sinfga kiruvchilar uchun barcha test topshiriqlarini to‘liq va xato qilmay bajarganda maksimal 10 ball to‘plash mumkin. Eng kam ball – 9. Birinchi sinfga kirish uchun to‘rtta imtihondan o‘tish talab qilinadi. Ularda suhbatni davom ettirish va berilgan savollar asosida uzluksiz monologik fikr bildirish qobiliyati, eshitilgan matnni tushunish, shuningdek, leksika va grammatika bilimi baholanadi. Har bir ishtirokchi uchun testdan o‘tish uchun taxminiy vaqt 15 daqiqa etib belgilangan.

Ikkinchi sinfdan boshlab, diagnostika ishlarida o‘qish va yozish ko‘nikmalarini tekshiruvchi topshiriqlar paydo bo‘ladi. Og‘zaki qism to‘rtta topshiriqdan iborat bo‘lib, taxminan 15 daqiqa davom etadi. Yozma qism yettita topshiriqni o‘z ichiga oladi va 30 daqiqa davom etadi. Barcha test topshiriqlarini to‘g‘ri bajargan ishtirokchi eng ko‘pi bilan 20 ball to‘plashi mumkin. Testdan o‘tish uchun kamida 18 ball olish lozim, shundan kamida 9 ball og‘zaki qism uchun berilishi kerak.

Uchinchi va to‘rtinchi sinfga kiruvchilar uchun ham xuddi shunday dastlabki balllar belgilangan. Biroq, uchinchi sinfga kiruvchilar uchun yozma qism sakkizta topshiriqdan, to‘rtinchi sinfga kiruvchilar uchun esa to‘qqizta topshiriqdan iborat bo‘ladi. Beshinchi sinfga kiruvchilar uchun dastlabki balllar o‘zgarishsiz qoladi, ammo yozma qismda birta ko‘proq topshiriq bo‘ladi. Oltinchi sinf o‘quvchilari 14 ta topshiriqni bajarishi lozim, shundan 4 tasi og‘zaki qismga tegishli. Test uchun maksimal ball – 22. Imtihondan o‘tish uchun kamida 20 ball olish kerak, shundan 9 tasi og‘zaki qism uchun bo‘lishi shart.

7-, 8- va 9-sinflarda yozma qismdagi topshiriqlar soni o‘zgarmaydi, ammo umumiy topshiriqlar soni 9 taga qisqaradi. Yozma qismni bajarish uchun 45 daqiqa, og‘zaki qism uchun esa 15 daqiqa ajratiladi.

10- va 11-sinf o‘quvchilari uchun testning maksimal balli 24, imtihondan o‘tish uchun eng kam ball 22 bo‘lib, shundan 9 tasi og‘zaki qismga tegishli. 10-sinf uchun test 15 ta topshiriqdan iborat bo‘lsa, 11-sinf uchun bitta kamroq bo‘ladi. Og‘zaki qism uchun 15 daqiqa, yozma qism uchun esa 60 daqiqa ajratiladi.

Eslatib o‘tamiz, Putin xorijliklar uchun oliy o‘quv yurtlariga kirishda yagona rus tili imtihonini ishlab chiqishni topshirgan.