Россиядаги мусулмонлар мигрантофобиядан хавотирда – муфтий Крганов

Россиядаги мусулмонлар мигрантларга нисбатан нафрат кучайиб бораётганидан хавотир билдирмоқда, дейди Россия мусулмонлари диний уюшмаси раҳбари муфтий Албир Крганов. Этник сабабларга кўра, провокацияларга қарши курашишда фуқаролик жамиятининг роли мавзусидаги давра суҳбатида сўзлаган нутқида у ушбу мавзу атрофида кескинлик кучаяётгани, нафрат тўлқини мамлакат фуқароси бўлган мусулмонлар орасида ҳам тарқалиши хавфи борлигини таъкидлаган. Крганов бу каби мавзуларни синчиклаб муҳокама қилиш муҳимлигини таъкидлаб, юзага келиши мумкин бўлган салбий оқибатлардан хавотир билдирган.

Яқинда Давлат Думаси депутатлари муҳожирларга, жумладан, Россия паспортига эга бўлган янги фуқароларга нисбатан бир қатор чеклов чораларини таклиф қилишди. Ушбу таклифлар Россия жамиятида хавотир уйғотмоқда ва баъзи кузатувчилар мамлакатда миллатлараро муносабатлар масалаларида “нафрат мавзуси” яна кучайганини таъкидламоқда.

Россия Жамоатчилик палатасининг миллатлараро муносабатлар ва миграция бўйича комиссияси раҳбари Владимир Зорин муфтий Кргановнинг хавотирларини қўллаб-қувватлади ва қонунчилик чораларини кўриб чиқиш ва масъулиятни ошириш зарурлигини айтди.