Rossiyaga xavfli metapnevmovirus yetib keldimi?

Buryatiyada aylanayotgan nafas yo‘llari viruslari orasida asosan bokaviruslar, RS-viruslar va paragripp viruslari uchramoqda, metapnevmovirus holatlari esa juda kamdan-kam qayd etilmoqda, deb xabar berdi RIA Novosti Respublika «Rospotrebnadzori» matbuot xizmatiga tayanib.

Juma kuni Shot Telegram-kanalida Xitoydan Rossiyaga metapnevmovirus «yetib kelgani» haqida xabar chop etildi. Unda Sverdlovsk viloyati, Buryatiya va Altay Respublikasida ushbu virus tarqalgani va «noodatiy virus butun oilalarni chalg‘itayotgani» aytilgan edi.

«Ayni paytda respublikada nafas yo‘llari viruslarining tarqalishini haftalik monitoring qilish ishlari davom etmoqda. Viruslar tarkibi o‘zgarmagan, asosan bokaviruslar, RS-viruslar va paragripp viruslari uchramoqda. Metapnevmovirus holatlari esa yakkam-dukkam kuzatilgan… Buryatiya Respublikasi bo‘yicha vaziyat «Rospotrebnadzor» nazoratida», — dedi agentlik suhbatdoshi.

Uning so‘zlariga ko‘ra, so‘nggi ikki hafta davomida o‘tkir nafas yo‘llari virusli infeksiyalari bilan kasallanish ko‘rsatkichi o‘zgarmagan va hududda guruhli kasallanish holatlari qayd etilmagan.

«Rospotrebnadzor» metapnevmovirusdan himoya choralari boshqa o‘tkir nafas yo‘llari virusli infeksiyalarniki bilan bir xil ekanini eslatib o‘tdi: qo‘llarni muntazam yuvish, yuzalarni tozalash va dezinfeksiya qilish, xonalarni shamollatish, kasallik alomatlari bor odamlar bilan aloqani cheklash. Agar o‘tkir nafas yo‘llari virusli infeksiyalari belgilari paydo bo‘lsa, shifokorga murojaat qilish zarur.