Rossiyaning ko‘p hududlarida migrantlar ishlashiga qo’yilgan taqiqlar uzaytirildi

Rossiyaning 30 dan ortiq hududlaridagi hokimiyat ayrim sohalarda migrant ishchilarga qo’yilgan taqiqlarni uzaytirdi. Masalan, Irkutsk viloyatida chet elliklarga jamoat transporti va taksi kabi 16 ta sohada ishlash taqiqlangan. Gubernator Igor Kobzev cheklovlarni 2026-yilga ham uzaytirish to’g’risidagi farmonga imzo chekdi.

Aholi taqiqdan keyin taksi chaqirish qiyinlashib, narxlar sezilarli darajada oshganidan shikoyat qilmoqda. Masalan, ilgari 350 rublga tushgan yo’lkira endi 600 rubl turadi. Biroq, haydovchilar orasida hali ham migrantlar bor. Ular vaqtinchalik yashash ruxsatnomasi (РВП), yashash ruxsatnomasi (ВНЖ), viza talab qilinadigan mamlakatlardan ishlash ruxsatnomasi yoki YeOII mamlakatlarida (Qozog’iston, Qirg’iziston, Armaniston va Belarus) fuqarolik maqomiga ega bo’lganlarga taalluqli emas.

Xabarovsk o’lkasida transport va uy-joy kommunal xizmatlarida ishlaydigan chet elliklarga qo’yilgan taqiq amalda qolmoqda. Rasmiylar buni haydovchilarda Rossiya “prava”si, haydovchilik tajribasi bo‘lishi va jarimaga tortilmaganligi bilan izohlamoqda. Bu mahalliy aholini ishga joylashtirishga ustuvor ahamiyat berish uchun qilingan.

Ko’pgina mintaqalarda migrantlar «taqiqlangan» sohalarni tark etib, ishchi kuchi yetishmasligi mavjud bo’lgan qurilish va chakana savdo sohalariga o’tib ketishdi.

Sankt-Peterburgda iyul oyidan beri kerakli hujjatlarga ega bo’lmagan chet elliklarga taksi haydovchisi sifatida ishlash taqiqlangan. Noyabr oyi oxirida taqiq yetkazib berish xizmatlariga ham tatbiq etildi. Ilgari kuryerlarning taxminan 20 foizi litsenziyaga ega migrantlar edi. Kompaniyalar kuryerlarning yetishmasligi yetkazib berish narxlarining oshishiga va kutish vaqtining uzayishiga olib kelishi mumkinligi haqida ogohlantirmoqda.

Kompaniyalar talabalar, nafaqaxo’rlar va vaqtinchalik ishchilarni jalb qilish orqali bu bo’shliqni to’ldirishga harakat qilmoqda. Bir tumanda “dostavshik” robotlar sinovdan o’tkazilmoqda, ammo mutaxassislarning ta’kidlashicha, ular inson ishchilarining o’rnini bosa olmaydi: robotlarning shaharda ishlashi va nostandart buyurtmalarni bajarishi qiyin.