Ryazanda velosiped o‘g‘irlagan migrant qo‘lga tushdi

Ryazandagi pitbul itini sayr qildirib, yo‘l-yo‘lakay qarovsiz qoldirilgan velosipedlarni o‘g‘irlagan migrant hibsga olindi. Bu haqda mahalliy politsiya xabar berdi.

Ichki ishlar vazirligiga ko‘p qavatli uylar aholisidan velosipedlar o‘g‘irlanayotgani haqida shikoyatlar kela boshladi. Xodimlar aholi bilan suhbatlashib, guvohlar it yetaklab o‘g‘irlangan velosipedlarga o‘xshash velosipedga minib ketgan erkakni ko‘rishgani aniqlashdi. O‘g‘irlangan velosipedlarning egalari itlarini sayrga olib bormagani uchun polisiya it yetaklab velosipedda sayrga chiqqan odamni qidira boshladi.

Huquqni muhofaza qilish organlari xodimlari itlar bilan sayr qilinadigan bog‘lardan birida velosipedda ketayotgan erkakni ko‘rib, uni qo‘lga olishdi. Velosiped yaqinda o‘g‘irlangan bo‘lib chiqdi.

Hibsga olingan shaxs 29 yoshda. U Markaziy Osiyo mamlakatlaridan biridan kelgan va Ryazanda qonuniy ravishda yashagan. Erkak ishini yo‘qotganidan so‘ng qarovsiz qolgan velosipedlarni o‘g‘irlay boshlaganini tan olgan. O‘g‘irlangan velosipedlarni tanishlariga sotgan. U jami uchta velosipedni o‘g‘irlagan ekan.

Unga qarshi o‘g‘irlik bo‘yicha jinoiy ish qo‘zg‘atildi, buning uchun besh yilgacha qamoq jazosi berilishi mumkin.

Shuningdek, u o‘z mamlakatida og‘ir jinoyat uchun xalqaro qidiruvga berilgani ma’lum bo‘ldi. Hozirda uni ekstradisiya qilish masalasi ko‘rib chiqilmoqda.