Sankt-Peterburgda migrant pichoqlandi: ikki gumondor hibsga olindi

Yakshanba kuni kechqurun Sankt-Peterburgdagi Grajdanskiy prospektidagi uylardan birida fojia yuz berdi. Markaziy Osiyo mamlakatlaridan birining fuqarosi bo‘lgan 38 yoshli erkak Kalininskiy tumanidagi ko‘p qavatli uyda o‘tkazilgan ichkilikbozlik paytida og‘ir jarohat oldi. U og‘ir ahvolda kasalxonaga yotqizildi.

Voqea haqida Sankt-Peterburg va Leningrad viloyati Ichki ishlar vazirligining Bosh boshqarmasi xabar bergan.

Polisiya ma’lumotlariga ko‘ra, kvartirada yana bir muhojir bo‘lgan. U jabrlanuvchi va ikki odam – erkak va ayol birga spirtli ichimlik ichganliklarini aytgan. Erkakning aytishicha, u yana aroq olib kelish uchun do‘konga ketgan. Qaytganida do‘stini pichoqlangan holda ko‘rgan. Juftlik esa g‘oyib bo‘lgan.

Bu guvoh polisiya bo‘limiga olib ketilgan. U yerda unga migratsiya ro‘yxatidan o‘tish paytida yolg‘on ma’lumot bergani uchun ma’muriy bayonnoma tuzilgan.

Keyinchalik Ichki ishlar vazirligi xodimlari gumondorlarni aniqlab, hibsga oldi. Ular qurilish kompaniyasida ishlaydigan 43 yoshli erkak va uning 33 yoshli ayol sherigi bo‘lib chiqdi. Erkakka mayda bezorilik uchun, ayol esa migratsiya ro‘yxatidan o‘tish paytida yolg‘on ma’lumot bergani uchun ma’muriy huquqbuzarlik ayblovlari qo‘yildi. Hozirda ikkalasi ham maxsus hibsxonada saqlanmoqda. Jinoyat ishi qo‘zg‘atish yoki qo‘zg‘amaslik to‘g‘risida qaror qabul qilinmoqda.