Shri-Lanka ham Rossiyaga migrant yubormoqchi

Shri-Lanka Rossiyaga mehnat migrantlarini yetkazib berishni kengaytirishga tayyor, deb ma’lum qildi mamlakatning Moskvadagi elchisi Shobini Gunasekera TASS agentligiga bergan intervyusida.

Uning ta’kidlashicha, mamlakatda ko’plab malakali va yarim malakali mutaxassislar bor bo’lib, ularni xorijiy davlatlar, jumladan, Rossiya yuqori ish qobiliyati, moslashuvchanligi va integratsiyalashish tufayli jalb qilishi mumkin. Diplomat Rossiyada ishchi kuchi yetishmasligini hisobga olgan holda, bu soha hamkorlik uchun istiqbolli imkoniyatlar yaratishini ta’kidladi.

Gunasekera shuningdek, Rossiya-Shri-Lanka turizm sohasidagi munosabatlari kuchli ekanligini va bu sohada yangi imkoniyatlar paydo bo’lishi mumkinligini aytdi. Bundan tashqari, elchi Rossiya davlat idoralari bilan energetika kabi sohalarda konstruktiv muzokaralar olib borilayotganini e’lon qildi.