So‘roq, xo‘rlash va deportatsiyalar: «Jukovskiy» migrantlar qopqoniga aylandi

O‘nlab tojikistonlik muhojirlar Moskva yaqinidagi “Jukovskiy” aeroportida bir haftadan ko‘proq vaqt davomida ushlab turilganini xabar qilgan.

Ular “Ozod Yevropa/Ozodlik” radiosiga jo‘natgan videoda temir karavotlar, beton pol, tez pishadigan makaron paketlariga to‘lib toshgan qamoqxonaga o‘xshash xona ko‘rsatilgan.

— Bu yerda bo‘lganimga 10 kun bo‘ldi. Bizga kuniga bir marta tez pishadigan makaron berishadi va tamom. Xonada taxminan 75 kishi, jumladan, yuragi kasal bemor ham bor, – deydi bir muhojir erkak.

Yana bir muhojirning aytishicha, ular o‘z hisobidan chipta sotib olib, uylariga uchib ketishni so‘rashgan, biroq ruxsat berilmagan.

Hibsga olinganlarning barchasi allaqachon deportatsiya bo‘yicha sud qarorlarini olgan. Ammo Rossiya rasmiylari odamlarning aeroportda bir necha hafta ushlab turilishi sababini tushuntirmagan.

Mamlakatga kirishni rad etish va deportatsiya bilan bog‘liq muammolar hozirda Markaziy Osiyodan bo‘lgan ko‘plab odamlarga ta’sir ko‘rsatmoqda. Rossiya Ichki ishlar vazirligi 2025-yilning birinchi yarmida deportatsiyalar soni 2024-yilning shu davriga nisbatan 17 foizga oshganini, xorijliklarga yashash uchun ruxsatnoma berish 30 foizga kamayganini ma’lum qildi.

2024-yilning mart oyida “Crocus City Hall”da sodir bo‘lgan va asosan Tojikiston fuqarolari ayblangan teraktdan keyin Rossiyada migrantlarga qarshi choralar kuchaytirilgan. O‘n minglab muhojirlar deportatsiya qilingan yoki kirishi taqiqlangan. Ko‘pchilik ksenofobiya va polisiya reydlaridan shikoyat qiladi.

Qirg‘izistonlik ayolning aytishicha, 1-avgust kuni o‘zi va O‘shdan uchayotgan boshqa yo‘lovchilar “Jukovskiy” aeroportida qo‘lga olingan.

– Bizni bir kundan ortiq derazasiz, havosi dim xonada saqlashdi. Bizga muddati o‘tgan makaronni berishdi. Bir qiz o‘zini yomon his qilganda biz tez yordam chaqirishni so‘radik, lekin qo‘riqchi elektroshoker bilan bizni qo‘rqitishni boshladi, – deb eslaydi u.

Ertasi kuni u hech qanday tushuntirishsiz deportatsiya qilingan.

Markaziy Osiyo davlatlari hukumatlari bunday holatlardan norozi ekanliklarini bildirgan, biroq o‘z fuqarolarini himoya qilish uchun jiddiy qadamlar qo‘ymayapti.

Hozirda Rossiyada O‘zbekiston, Tojikiston va Qirg‘izistondan millionlab muhojirlar mehnat qilmoqda. Ularning oilalari uchun Rossiyadan pul o‘tkazmalari yagona daromad manbai hisoblanadi.

https://rus.azattyq.org/a/novaya-volna-presledovaniy-vyhodtsev-iz-tsentralnoy-azii-v-rossii/33508547.html