Сургутда илк хорижий фуқароларни мослаштириш маркази очилди

Эндиликда мигрантларнинг Юградаги ҳаётга мослашишига минтақадаги биринчи Хорижий фуқароларни мослаштириш маркази орқали ёрдам берилади.

Сургут шаҳрида бундай марказ очилгани ҳақида “Югра” телеканали хабар берди.

“Бу ерга келган чет эл фуқароси ҳеч нарсани билмайди, …Мутахассислар марказда муҳожирларга қандай ҳокимиятлар, қонунлар, шарт-шароитлар, ҳаёт тарзи, хулқ-атвор нормалари мавжудлигини кўрсатади, ҳудуд маданиятини айтиб беради.

Буларнинг барчаси айтилади, мигрант жамиятимизга муваффақиятли мослаштирилади ва шундан кейингина чет эл фуқароси ишга жойлашиш учун барча керакли ҳужжатларни расмийлаштиради”, — дейди муассаса раҳбари Карен Степанян.

Марказ ҳужжатларни ягона дарча принципи бўйича тезда расмийлаштириш имконини беради. Бу ерда мигрантлар тиббий кўрикдан ўтади ва бепул юридик маслаҳат олади. Марказнинг қуввати ойига 3000 нафаргача муҳожирни қабул қилиш имконини беради.

Марказ фаолияти шаҳар ҳокимлиги, аҳолига ижтимоий хизмат кўрсатиш комплекс маркази, бандликка кўмаклашиш маркази ва шаҳар диаспоралари билан ҳамкорликда амалга оширилмоқда.