Sverdlovsk viloyatida hujjatsiz muhojirlarni ishlatgan tadbirkor jazolandi

Rej shahrida tadbirkor Nasriddin Boboyev hujjati bo‘lmagan muhojirlarni ishga olgani uchun sudlandi. U mahalliy korxonaga tozalash xizmatlari uchun ishga Rossiyada noqonuniy bo‘lgan 8 nafar chet el fuqarosini yollagan.

Boboyev muhojirlarni uy-joy, yashash sharoiti bilan taʼminlagan, hatto migratsiya xizmati kelsa, oʻzini qanday tutish haqida koʻrsatmalar ham bergan. Ish uchun pul uning hisob raqamiga tushgandan so‘ng ishchilarga o’zi to’ladi. Tergov natijalariga ko‘ra, korxona rahbariyati ishchilarning hujjatsiz ekanligini bilmagan.

Biroq, politsiya bu sxemani fosh qildi. Boboyevga nisbatan noqonuniy migratsiyani tashkil qilgani uchun jinoiy ish ochilgan.

Sudda u aybini tan oldi va tergov bilan hamkorlik qildi. Sud, shuningdek, uning oilasiga yordam berganini, bolalar va volontyorlar tashkilotlarini qo’llab-quvvatlaganini ham hisobga oldi.

Natijada Boboyev aybdor deb topilib, unga 2 yil shartli qamoq jazosi, 1 yil sinov muddati belgilandi. Shuningdek, u 100 ming rubl miqdorida jarimaga tortildi.

Noqonuniy mehnatdan foydalanish jiddiy muammolarga olib kelishi mumkinligini unutmang.