Тошкент аэропортида ухлаш учун капсулали меҳмонхона очилади

«Uzbekistan Airports» хоналар нархи тахминан қанча бўлиши тўғрисида маълумот берди.

Тошкент халқаро аэропортида транзит йўловчилар вақтини бемалол ўтказиши ва ҳатто ухлаши мумкин бўлган капсулали меҳмонхоналар пайдо бўлади. Бу ҳақда  матбуот анжуманида маълум қилинди, деб хабар бермоқда Nova24.

«Uzbekistan Airports» раҳбари Раъно Жўраеванинг таъкидлашича, кўплаб йўловчилар кутиш залида ўтирган ҳолда стулларда ухламоқда. Бу рўйхатга хорижлик йўловчилар ҳам киради. Тошкентга энг узоқ парвоз Лондонга амалга оширилади. Шу сабабли йўловчиларга қулайлик яратиш мақсадида капсула хоналари фаолияти йўлга қўйилмоқда.

Шунингдек, яқин келажакда аэропортда кутиш залида тўғридан-тўғри ухлаш мумкин бўлган қулайроқ стуллар сотиб олиш режалаштирилмоқда, март ойига келиб эса хоналари бўлган капсулали меҳмонхона ташкил этиш режалаштирилган. Бошқа вилоятлардан машина ҳайдаб келаётган, умуман ухламаган йўловчилар бор, улар ҳам парвоз олдидан бир-икки соат ухлаш имконига эга бўлади.

Айни пайтда меҳмонхонани бошқарадиган компания аниқланмаган, менежмент жараёни кимга берилиши ҳозирча номаълум. Дастлаб «Uzbekistan Airports» лойиҳа учун тўловни амалга оширади. Капсулали меҳмонхонада парвозни ўтказиб юбормаслик учун шахсий жиҳозлар, кўрпа-тўшак, илгичлар, шиппак, стол, душ, ҳожатхона ва ташқи алоқага эга 27 та хона бўлиши режалаштирилган. Нарх бўйича жаҳон аэропортлари тажрибаси ўрганилади. Улардан бироз пастроқ нарх қўйилади, лекин у сармоя таркибидан келиб чиқиб белгиланади.