Тожикистон ЕОИИга киришни режалаштирмаяпти

Тожикистоннинг Россия, Арманистон, Беларус, Қозоғистон ва Қирғизистонни ўз ичига олган Евроосиё иқтисодий иттифоқига қўшилиши масаласи 2015 йилдан бери муҳокама қилинмоқда.

Тожикистонга ташриф буюрган Россия ташқи ишлар вазири Сергей Лавровнинг баёнотларини изоҳлар экан Тожикистон Ташқи ишлар вазирлиги ахборот ва матбуот департаменти раҳбари Шоҳин Самадий Душанбе Евроосиё иқтисодий иттифоқига (ЕОИИ) қўшилиш эҳтимолини кўриб чиқмаётганлигини маълум қилди.

Лавров Марказий Осиёни Кремл ва “коллектив Ғарб” қарама-қаршилигининг янги жабҳаси деб атаб, Тожикистон тез орада “ЕОИИга қўшилиш фойдасини ўзи белгилашига” умид билдирган эди.

Шоҳин Самадийнинг таъкидлашича, Тожикистоннинг ЕОИИга интеграциялашуви на Сергей Лавровнинг республика президенти Имомали Раҳмон билан учрашувида, на мамлакат ташқи ишлар вазири Сирожиддин Муҳриддин билан музокараларда муҳокама қилинган. “Тожикистоннинг ЕОИИга кириши масаласи кун тартибида эмас. Душанбедаги учрашувларда  икки давлатнинг халқаро ташкилотлар доирасида фақат савдо-иқтисодий ва маданий-гуманитар ҳамкорликни фаоллаштириш, минтақавий хавфсизликни таъминлаш, шунингдек, давлатларнинг ўзаро ҳамкорлиги масалаларига эътибор қаратилди”, — деган ТАСС агентлигига берган интервюсида ташқи ишлар вазирлиги вакили.

Тожикистоннинг Россия, Арманистон, Беларус, Қозоғистон ва Қирғизистонни ўз ичига олган ЕОИИга қўшилиши масаласи 2015 йилдан бери муҳокама қилинмоқда. Бироқ, иттифоқ мамлакатлари Тожикистоннинг энг йирик савдо шериги (2022 йилда ташқи савдонинг 44 фоизини ташкил этади) бўлса-да, Душанбе ташкилотга аъзо бўлиш ниятида эмас.

Шу ўринда Россия Федерациясида Марказий Осиёлик меҳнат муҳожирлари, хусусан, тожикистонликларга бўлаётган ноқонуний ҳибс ва полиция зўравонликлари мазкур мамлакатни ЕОИИга киргизиш учун босим эмасми, деган фикрлар пайдо бўлади.