Тожикистондан Россияга қатновчи поездларга чипталар сотила бошланди. Уларнинг нархи қанча?

Тожикистондан Россияга икки йиллик танаффусдан сўнг биринчи темир йўл рейсига бир кунда 200 та чипта сотилди.

Чипталарни Тожикистон темир йўллари кассаларидан харид қилиш мумкин. ДУК матбуот хизматининг “Азия-Плюс” порталига хабар беришича 9 август куни 200 та чипта сотиб бўлинган.

Кўлоб – Волгоград – Кўлоб йўналишидаги поезд чиптаси нархи плацкарт вагонларга 1580 сомоний, купеларга 2040 сомоний қилиб белгиланган. Душанбедан Волгоградга чипталар нархи бироз арзонроқ: плацкарт вагонларга – 1435 сомоний, купелар учун – 1856 сомоний.

Хўжанддан чипта нархи қанчалиги ҳозирча номаълум.
Икки йиллик танаффусдан сўнг илк йўловчи поезди 16 август куни соат 00:10 да Кўлобдан Волгоградга жўнайди.

Душанбедан Волгоградга поезд 27 август кунидан ҳаракатланади,“Хўжанд- Волгоград – Хўжанд” рейси қатнови эса 7 сентябрга белгиланган.

Рейслар ҳар ҳафта амалга оширилади, ҳаракатланиш вақти жўнаш жойига қараб 2,5 суткадан 3,5 суткагача.

Эслатиб ўтамиз, поездлар ҳаракати икки йил аввал COVID-19 га қарши чоралар вақтида чекланган эди.