Тўйимга ҳеч кимни айтмайман

Биринчи воқеа

Москвада яшайман ва ўқийман. Бугун бир ака билан гаплашиб қолдим. Қолгани аканинг тилидан:

Узунлиги 24 метрли уйим бор. Яна фундамет ташлаганман 12х16. Шуни кўтаришим керак, 500 миллионча пул кетса керак. Сўрадим: Ўша уй бўлмаса, яшашингиз ёмонлашадими?

– Йўқ… Энди барибир уй керак-да

– Уйингиз бор экан-ку

– У “временка”да, катта уй барибир бошқача-да (орзуга берилиб)

Бироздан кейин икки суткада бери кундузги ва тунги сменада тўхтамасдан ишлаётгани, опасининг эри Каптивасини уриб олгани, унга пул бермаса хафа бўлиши, буйраги шамоллаб кетганлигини айтиб ҳасрат қилар экан, яна сўрадим:

– Ака, ўша уй ростдан нега керак?

Жуда узоқ ўйланди (менимча фикрлари машъум қобиқни ёриб ўта олмади) ва жавоб берди:

– Керак-да, эл кўриши керак…

Иккинчи воқеа

Бир дўстим билан жуда яқин эдик, ўртамизда сирлар жуда кам эди. Мен лицейда иккинчи курс пайтимда Россияга кетди. Тинмасдан ишлади, кам деганда ойига 1500 $ жўнатар эди. Телеграм, Ватсап орқали гаплашиб турардик. Коллеж тугар пайт отаси бориб дипломини пул бериб олиб келди. У келмасдан ишлади. Менга айтарди: бораман, пулимга 4-5 та магазин сотиб олиб, арендага бераман. Кейин маза қилиб яшайман.

Келди…

Ёзда, кейин менга ёрилди. Отаси уйнинг ичини ранги ёқмай қолган кун ўзгартираркан. Гранит, мармар тошлар тўшалган дарвозахона. Машинани безаш учун кетган фалон пул. Онаси қачон янги латта чиқса, ўшандан олиб сеп, кўрпа-тўшак заказ бераркан. Хуллас, ўзи олиб келган 2000 $ дан ташқари уйда 700 $ пул бор экан…

Бир хафта ўтгач отаси:

– Ўғлим, яна 2-3 йил ишлаб келсанг, машинани янгилаб, сени уйлантирворардик, дебди…

Менга ёрилди: 6 йилда соғликдан асар ҳам қолмабди, даволанишини ўзига анча кетаркан…

Ёлғиз ўғил эди…

P.S: Қачонки, “тўйчи”лар ва “латтапуруш”лардан қутулар эканмиз, ўшанда ривожланиш ҳақида нимадир дейиш мумкин.

Бу йўлларига пойандоз солинган “туячи”лар ва онаси дарвозага пул йиққан “қаймоқ”чиларга ҳам тегишли.