Tulada soxta hujjatlarni yasagan ikki o’zbekistonlik qo‘lga olindi

Tula viloyati prokuraturasi 37 va 35 yoshli ikki nafar O’zbekiston fuqarosiga qarshi jinoyat ishi bo’yicha tergovni yakunladi. Ular soxta hujjatlar yordamida Rossiyada chet elliklarning noqonuniy qolishini tashkil qilishda ayblanmoqda.

Tergov ma’lumotlariga ko‘ra, 2025-yil yozida sudlanuvchilar jinoiy sxema tuzgan. Ular ish ruxsatnomasi olishni istagan, ammo rus tili va Rossiya qonunlarini bilishini tasdiqlovchi zarur sertifikatlari bo’lmagan 15 nafar migrantni topishgan.

Qoidalarni chetlab o’tish uchun jinoyatchilar migrantlar uchun soxta pasportlar sotib olib, ularning o’rniga imtihon topshirish uchun boshqa odamlarni yollagan va zarur sertifikatlarni olgan. Ish ruxsatnomalari ushbu soxta hujjatlar yordamida berilgan.

Noqonuniy faoliyat Tula viloyati FSB boshqarmasi tomonidan aniqlandi va to’xtatildi. Jinoyat ishi sudda ko’rib chiqish uchun Tula markaziy tuman sudiga yuborildi.