Туркия Ички ишлар вазирлиги ноқонуний мигрантларни қидиришни бошлайди

Ички ишлар вазирлиги 153 та мобил пунктни жиҳозлаб улар ёрдамида Туркиянинг 30 та йирик шаҳрида ноқонуний муҳожирлар устидан назоратни кучайтиради.

Туркия Ички ишлар вазири Али Ерликая декабр ойидан бошлаб мамлакат бўйлаб кўчма миграция пунктлари орқали ноқонуний миграцияни назорат қилиш амалиётини кенгайтиришини маълум қилди.

“Бу амалиёт аввалроқ Истанбулда пилот режимда жорий қилинган. Тўққиз ой давомида бирорта ҳам муаммо юзага келмади. 1 октябрдан Анқара, Бурса, Измир ва Аданада мобил миграция пунктлари пайдо бўлади”, – дея унинг сўзларидан иқтибос келтирган ТРТ телеканали. 1 ноябрдан Ички ишлар вазирлиги 153 та мобил пунктни жиҳозлайди ва улар ёрдамида Туркиянинг 30 та йирик шаҳрида ноқонуний муҳожирлар устидан назоратни кучайтиради, 1 декабрдан эса бу амалиётни бутун мамлакат бўйлаб кенгайтиради.

Мобил миграция пункти – бу ҳужжатлар ва биометрик маълумотларни назорат қилиш учун зарур бўлган тизимлар ва қурилмалар билан жиҳозланган ўрта ўлчамдаги транспорт воситаси. Ерликаянинг сўзларига кўра, полиция ҳамма жойда, жумладан оммавий тадбирлар ва футбол ўйинларида ҳам ҳужжатларни танлов асосида текширади.

“Биз турист ёки чет эл фуқаросини ёнида ҳужжати бўлмаса, дарҳол миграция марказига юбормаймиз. Ҳа, ноқонуний миграцияга қарши кураш сабр-тоқат талаб қиладиган жараён. Қолаверса, Туркия туристик давлат. Биз хато қила олмаймиз, “- деди у. Расмийлар чет элликлар билан таржимонлар ва бошқа мутахассислар бўлган мобил пунктларда мулоқот қилишади. Бундан ташқари, у ерда бармоқ излари умумий миграция маълумотлар базасига нисбатан ҳам текширилиши мумкин.

Расмийлар аввалроқ тушунтирганидек, агар фуқаро шахсини тасдиқловчи ҳужжатни тақдим эта олмаса ва тизимда мамлакатда узоқ муддат бўлиш учун ҳужжатларни олишдан олдин олинадиган бармоқ излари бўлмаса, у ҳолда қонунбузар қўшимча текшириш учун миграция бўлимига олиб кетилади. Оддий сайёҳлар учун тартиб бошқача бўлиши кутилмоқда ва полиция уларнинг мамлакатда дам олишини қийинлаштирмайди.

Йил бошидан буён Туркия миграция идоралари 97,3 минг ноқонуний муҳожирни қўлга олди. Улардан 42,8 минг нафари мамлакатдан чиқариб юборилган. Асосан Афғонистон, Покистон, Эрондан келган 70 мингдан ортиқ ноқонуний мигрантларнинг республикага кириб келишининг олди олинди. Ҳукумат маълумотларига кўра, яшаш рухсати муддати тугаган ва узайтирилмаган 105 мингдан ортиқ хорижлик ҳаво йўллари орқали Туркияни тарк этган.