Ўғирланган конфет учун москваликни калтаклаган мигрант Россиядан чиқариб юборилади

Ўтган ҳафтада конфет ўғрисини тутган мигрантлар қўлга олингани ҳақида хабар берган эдик.

Люблино туман суди бир қути шоколад ўғирлаган москваликни жазолаган “Пятерочка” дўконининг қўриқчисини Россия Федерациясидан чиқариб юбориш тўғрисида қарор чиқарди.

Суд 25 ёшли Суннат M.ни Маъмурий жавобгарлик тўғрисидаги кодекс моддасини бузган ва ноқонуний меҳнат фаолиятини амалга оширганликда айбдор деб топди. Маълум бўлишича, эркак Россияда ишлаш учун рухсатномасиз қўриқчи бўлиб ишлаган. Судя Суннатга 5 минг рубль жарима қўллаб, Россия ҳудудини тарк этишни буюрди.

14 январь куни 37 ёшли Москва фуқароси дўконга дўсти билан кириб, конфет ўғирлаган. Буни “Пятерочка” ходимлари пайқаб қолишган. Қўриқчи ва унинг ўртоғи, ўғриларни тутиб, конфетнинг пулини тўлатишган ва калтаклаб жўнатиб юборишган.

Ҳужум акс этган видео ижтимоий тармоқларда тез тарқала бошлади ва полиция бу иш билан қизиқиб қолди. Натижада 23 ёшли Сарварбек ва 25 ёшли Суннатга нисбатан Россия Федерацияси Жиноят кодексининг 213-моддаси (Безорилик) моддаси 1-қисми “а” банди билан жиноят иши қўзғатилган.

Ҳуқуқ-тартибот идоралари муштлашув олдидан содир бўлган ўғирликни ҳам тергов қилмоқда.