Урушга боришни истамаган муҳожирлар калтакланди

Украинага қарши урушга боришдан бош тортиш қарори Россиядаги тожик муҳожирлар учун оғир оқибатларга олиб келди, улардан икки нафари қаттиқ қийноқларга ва депортацияга учради.

Анвар (исми хавфсизлик нуқтаи назаридан ўзгартирилган) Москва вилоятидаги “Сахарово” миграция марказига ташриф буюрган куни армияга таклиф қилинган. Ундан ўз ихтиёри билан урушга бориш тўғрисида шартнома имзолашни сўрашган, бироқ рад жавобидан кейин калтакланган.

Анвар қаровсиз қолган онаси учун масъулият туфайли бу таклифни қабул қила олмаслигини тушунтирган. Унга ишонмаган  марказ ходимлари унга жисмоний куч ишлатишган.

Яна бир муҳожир, тожикистонлик Мансур Ҳожиев Перм вилояти миграция бўлимида худди шундай ҳолатга дуч келган. У урушда қатнашиш учун шартнома имзолашдан бош тортганидан сўнг уни гиёҳванд моддаларни истеъмол қилишда айблашган. Мансур қаттиқ қийноқларга солиниб, сохта иқрорномага имзо чекишга мажбур бўлган.

Иккала муҳожир ҳам урушдан бош тортиш қурбони бўлган, қийин вазиятларга тушиб қолган ва зўравонликка дуч келган. “Сахарово” маъмурияти ва миграция департаментининг позицияси номаълумлигича қолмоқда.

Украинага жангга жўнатилган ўнлаб Тожикистон фуқаролари ҳақида маълумотлар маълум бўлди. Баъзиларни шартнома имзолашга кўндиришган бўлса, бошқаларга Россияда қамоқдан озод қилиш ваъда қилинган, айримлари эса Россия фуқаролигини олиш ниятида бўлишган. Йигирмадан ортиқ  тожикистонликларнинг жанговар ҳаракатларда ҳалок бўлгани ҳақида хабарлар тасдиғини топган. Тожикистон ҳукумати ўз фуқароларини Россия томонида урушда қатнашишга чақирилаётганига нисбатан сукут сақлашни маъқул кўрмоқда.