Донецкка ишга борган ўзбеклар мажбуран урушга жалб қилинмоқда

Украина қуролли кучлари бош штаби: Донецк вилоятидаги Россия қўшинлари таркибида Ўзбекистон фуқаролари топилган.

Украинанинг Россия томонидан босиб олинган Донецк вилоятининг Горловка шаҳрида жойлаштирилган Россия армиясининг бўлинмаларида Ўзбекистон фуқаролари топилган. Бу ҳақда Украина Қуролли кучлари Бош штаби маълумотида айтилган.

“Ушбу шахслар Мариуполга қурилиш ишлари учун келишган. Улар келгандан кейин паспортларини олиб қўйилган ва кўнгиллилар сифатида ҳарбий хизматга сафарбар қилинган”, дейилади хабарда.

Бу ҳақда Ўзбекистон ташқи ишлар вазирлигига сўров юборилган. Вазирликдаги манбанинг айтишича, ташқи ишлар вазирлиги хабарни текширишни бошлаган.

Март ойида Ўзбекистон давлат хавфсизлик хизмати хабар беришича, Россияда қамоқ жазосини ўтаётган Қорақалпоғистоннинг Элликқалъа  туманида яшаган фуқаро Украинада вафот этган. Хабар қилинишича, фуқаро Украинага қурилиш ишлари учун юборилган ва у жойлашган жойга снаряд урилган.

Май ойи охирида МХХ шунингдек, Россия қамоқхонасидан Украинадаги урушга сафарбар қилинган Ўзбекистон фуқароси вафот этганини хабар қилган. Марҳумнинг онаси у илгари ҳеч қачон қўлида қурол тутмаганлигини таъкидлаган. “Онажон, мен уларга одамларни ўлдирмаслигимни, у ерга бормаслигимни айтдим, лекин барибир мени мажбурлашди”, деган унинг ўғли сўнгги суҳбатида.

Июн ойида ВВС рус хизмати Марказий Осиё мамлакатлари фуқароларини Россия қамоқхоналарида Украинадаги урушга жалб қилиш бўйича тергов эълон қилган эди. Сайт маълумотларига кўра, ёлланганлар орасида камида 93 киши, шу жумладан 34 нафар ўзбекистонлик ҳалок бўлган.