Ussuriyskda ikki oʻzbekistonlik uzoq yilga qamaldi

Primore oʻlkasining Ussuriysk tuman sudi ikki oʻzbekistonlik fuqaroni yashirin joylar (“zakladka”lar) orqali giyohvand moddalarni sotishga urinishda ayblab qamoq jazosiga hukm qildi.

Ulardan biri 11 yil, ikkinchisi esa 10 yil ozodlikdan mahrum qilish jazosini oldi. Jazoni qattiq tartibli axloq tuzatish koloniyasida oʻtashga hukm qilindi.

Tergov aniqlashicha, 2025-yil yanvar oyida 31 va 22 yoshdagi Oʻzbekiston fuqarolari oʻzaro va yana ikki nafar sherigi bilan giyohvandlik vositalarini yirik miqdorda sotishga kelishib olishgan. Aloqa uchun ular internet va messenjerdan foydalangan. 2025-yil fevral oyida erkaklardan biri noma’lum shaxsdan vazni 24,61 grammdan kam boʻlmagan giyohvandlik moddasi aralashmasini olgan. Bu hajm yirik miqdor hisoblanadi. Ular taqiqlangan moddalarni Primore oʻlkasining aholi punktlarida sotishni rejalashtirishgan.

2025-yil 3-fevralda sheriklar giyohvand moddalarni yashirin joylarga joylashtirish uchun Ussuriyskdagi Vladivostok shossesi boʻylab mashinalarda yoʻlga chiqqan. Ulardan biri oldindagi politsiya postlarini bilish uchun ketayotgan edi. Biroq, ular oʻz rejalarini yakunlay olishmadi, chunki mashinalar politsiya xodimlari tomonidan toʻxtatildi. Muhojirlar qochishga urinishdi, ammo ta’qibdan soʻng ular Nadejdinskiy tumanida qoʻlga olindi. Ushbu til biriktirishning boshqa ishtirokchilariga nisbatan jinoyat ishi alohida yuritildi.

Ussuriyskda 21 va 24 yoshdagi Oʻzbekiston fuqarolari ham hibsga olingan edi. Ular ham giyohvand moddalarni sotishga urinishda gumon qilinmoqda. Tergov talqiniga koʻra, 2026-yil 11-iyulda ular Rakovskaya koʻchasi hududida umumiy vazni 11,74 gramm boʻlgan giyohvandlik vositasi aralashmasini sotishga urinishgan.