Ўзбекистонда энг кам ойлик иш ҳақи 15 фоизга ошди

Ўзбекистон Президенти Шавкат Мирзиёев 20 ноябрь куни 1 декабрдан ойлик иш ҳақлари, пенсиялар, стипендия ва нафақалар миқдорини ошириш тўғрисидаги фармонни имзолади.

Ҳужжат «республика аҳолисининг даромадлари ва турмуш даражасини янада муттасил ошириб бориш, валюта сиёсатини либераллаштириш шароитида фуқароларга ижтимоий мададни кучайтириш мақсадида» қабул қилинди.

Бюджет муассасалари ва ташкилотлари ходимларининг иш ҳақи, пенсиялар, стипендиялар ҳамда нафақалар миқдори ўрта ҳисобда 1,15 баравар оширилди.

Эндиликда:

иш ҳақи — ойига 172240 сўм (аввал— 149775 сўм эди);

ёшга доир пенсия ва болаликдан ногиронларга бериладиган нафақа — ойига 336880 сўм (292 940);

зарур иш стажига эга бўлмаган кекса ёшдаги ва меҳнатга лаёқатсиз фуқароларга бериладиган нафақа ойига 206720 сўм (179 755) миқдорида белгиланди.

Иш ҳақи ҳамда пенсияларга қўшилган устама ва қўшимча ҳақларнинг барча турлари, энг кам иш ҳақига нисбатан белгиланган компенсация ва бошқа тўловлар 1 декабрдан бошлаб Президент Фармонида белгиланган энг кам иш ҳақи миқдоридан келиб чиққан ҳолда амалга ошириш белгилаб қўйилди.

Хўжалик ҳисобидаги корхона ва ташкилотларга 1 декабрдан бошлаб фармонда белгиланган энг кам иш ҳақига мувофиқ, ишлаб чиқариш самарадорлигини ошириш ва меҳнат сарфини камайтириш ҳисобига иш ҳақи миқдорини ошириш белгиланди.

Охирги марта энг кам иш ҳақи 2016 йил октябрда 15 фоизга ошган эди.