Vladikavkazda o‘zbekistonlik migrant halok bo‘ldi

Vladikavkazda chiqindi tashuvchi mashinasida sodir bo‘lgan portlashda Jaloliddin ismli 42 yoshli o‘zbekistonlik muhojir halok bo‘lgani xabar berildi. Uning besh farzandi yetim qolgani aytilmoqda.

Dastlabki tergovlarga ko‘ra, bunga chiqindida topilgan portlovchi qurilmalarning detonatsiyasi sabab bo‘lgan. Tozalash xizmati xodimi ichida mushakbozlik vositalari solingan karton qutini konteynerga tashlagan. Chiqindi zichlanganda detonatsiya tufayli quti portlagan.

Portlash shunchalik kuchli bo‘lganki, chiqindi tashuvchi mashinaning gidravlik tizimi uzilib ketgan. Erkak zarbadan darhol vafot etgan.

Shimoliy Osetiya bo‘yicha Tergov qo‘mitasi Rossiya Jinoyat kodeksining 109-moddasi 1-qismi bo‘yicha ehtiyotsizlik tufayli o‘limga sabab bo‘lish moddasi bo‘yicha jinoiy ish qo‘zg‘atdi. Prokuratura ham tergov boshladi.

Tergovchilarning fikricha, fojia 10-aprel kuni sodir bo‘lgan yana bir voqea bilan bog‘liq bo‘lishi mumkin. O‘sha kuni Vladikavkazda noqonuniy mushakbozlik ombori portlagan edi. Taxminan 20 ta portlash natijasida katta yong‘in chiqqan. Uch kishi halok bo‘lib, 15 kishi, jumladan, bolalar jarohat olgan edi. Shaharda favqulodda holat e’lon qilindi.

Chiqindi tashuvchi mashina portlagan joy ombordan taxminan 100 metr uzoqlikda joylashgan. Tergovchilarning fikricha, kimdir qolgan mushakbozlik buyumlarini yoki uyda tayyorlangan portlovchi moddalarni oddiy chiqindi bilan birga tashlab yuborgan bo‘lishi mumkin.

Ombor noqonuniy ravishda sifatsiz mushaklar ishlab chiqarilgan joy sifatida tanilgan. Bino egasi va operatsiya tashkilotchilari allaqachon ish yuzasidan hibsga olingan.

Shimoliy Osetiya rahbari Sergey Menyaylo voqea joyiga yetib keldi va vaziyatni nazorat ostiga oldi. U aholini xavfli narsalarni chiqindiga tashlamaslikka, balki ularni mutaxassislarga topshirishga chaqirdi.

Portlashdan keyin chiqindi tashuvchi mashina maxsus poligonga yuborildi. U yerda mutaxassislar ichkarida boshqa xavfli narsalar yo‘qligiga ishonch hosil qilish uchun barcha chiqindilarni tekshiradi.