Yangi yil bayramlarida Rossiyadan O‘zbekistonga sayyohlar oqimi kutilmoqda

«Aviasales»ning matbuot xizmati Yangi yil bayramlari davrida Moskvadan O‘zbekiston, Tailand va Sochiga aviaqatnovlar eng mashhur yo‘nalishlar qatoriga kirishi kutilayotganini xabar qilgan.

«Aviasales Moskvadan yangi yil ta’tili uchun aviachiptalarning avvalgi bronlarini tahlil qildi. Rossiyalik dam oluvchilarning yarmidan ko‘prog‘i (53%) yangi yil bayrami kunlarida xorijga sayohat qilishni niyat qilgan. Eng mashhur xalqaro yo‘nalishlardan biri O‘zbekiston bo‘lib, barcha xalqaro parvozlarning 18% ni tashkil etmoqda, Tailand – 10%, Armaniston – 5%, Turkiya – 5% va Belarus – 5%», – deyiladi matbuot xizmati xabarida.

Shuningdek, matbuot xizmati ma’lumotlariga ko‘ra, har o‘nta xalqaro yo‘lovchidan biri bolalari bilan dam olishga yo‘l oladi. Bu esa bevosita yangi yil bayramlarida O‘zbekistonga rossiyalik sayyohlar oqimi kutilayotganini anglatadi.