Yekaterinburgda migrantlarga taksi va avtobuslarda ishlash taqiqlanishi mumkin

Yekaterinburgda muhojirlarga avtobus, taksi va yuk mashinalari haydovchisi boʻlib ishlashni taqiqlashlari mumkin. Sverdlovsk «GAI»si nazorat faoliyati boʻlimi boshligʻi oʻrinbosari Aleksandr Porubenko shunday taklif bilan chiqdi. Inspektorlar allaqachon maxsus hujjat ishlab chiqqan. Ushbu hujjatni joriy oyda gubernator oʻrinbosari raisligidagi ishchi komissiya muhokama qiladi, keyin esa ma’ruza Sverdlovsk viloyati gubernatoriga topshiriladi.

Bu taklifga 10-iyun kuni shahar markazida, 8-Mart koʻchasidagi Bolshoy Zlatoust ibodatxonasi yaqinida yuz bergan ogʻir avariya sabab boʻldi. Avtobus haydovchisi piyodalar olomoniga borib urilgan. Mashina gʻildiraklari ostida toʻrt kishi halok boʻldi. Migrant haydovchi Yekaterinburgga yil boshida ishlash uchun kelgan va rasmiy ravishda ishga joylashtirilgan edi.

Avariyadan keyin haydovchi oʻz tushuntirishlarida chalgʻib ketdi. U yashil chiroqdan oʻtib olishga ulgurmoqchi boʻlganini aytdi. Keyin esa u ahvoli yomonlashganini: boshi aylanib, koʻrishi yomonlashganini va gaz hamda tormoz pedallarini adashtirib yuborganini ta’kidlagan. YTHdan keyin haydovchi va transport korxonasi direktoriga nisbatan jinoyat ishlari qoʻzgʻatildi. Ikkalasi ham tergov davrida SIZOga yuborildi.

GAI vakillari ba’zi chet elliklar oʻz milliy haydovchilik guvohnomalari bilan tashuvlarda qonuniy ishlay olmasligini iddao qilmoqda. Biroq taksoparklar va yuk tashish kompaniyalari rahbarlari ushbu qonunni buza boshladi. Shu sababli GAI chet el fuqarolarining ayrim toifalarini ma’lum turdagi transport vositalariga ishga qabul qilishni taqiqlashni taklif qilmoqda. Cheklovlar yoʻlovchilarni muntazam tashish, buyurtma boʻyicha yoʻlovchilarni tashish va xavfli yuklarni tashish uchun joriy etilmoqchi. Bunday qoidalar Rossiyaning bir nechta boshqa hududlarida allaqachon amal qilmoqda.