Жанубий Корея меҳнат визаларини беришни рекорд даражада кўпайтирмоқчи

Корея келгуси йили кўплаб соҳаларда ишчи кучи етишмовчилиги кучайиб бораётгани сабабли Меҳнатга рухсат бериш тизими (EPS) бўйича рекорд даражадаги 165 минг меҳнат муҳожирини жалб қилади, деб хабар бермоқда Yonhap.

Ҳукумат, шунингдек, Е-9 визасига эга хорижий ишчилар ишлаши мумкин бўлган соҳаларни кенгайтириб, ресторан, тоғ-кон саноати ва ўрмон хўжалигини ҳам қўшади.

Е-9 визаси меҳнатга рухсатнома тизими (Employment Permit System – EPS) орқали қўлда ва касбий бўлмаган иш билан шуғулланишни истаган ишчиларга берилади. Ушбу визани 16 давлат, жумладан Қирғизистон ва Ўзбекистон фуқаролари олишлари мумкин.

Ишлаб чиқаришда Е-9 визаси эгаларининг энг кўп сони – 95 000 та, қишлоқ хўжалиги ва чорвачиликда – 16 000 та, хизматлар кўрсатиш соҳасида – 13 000 та, балиқчиликда – 10 000 та, қурилишда – 6 000 та ва кемасозликда – 5 000 та бўлади, қолган 20 000 виза соҳасидан қатъи назар тақсимланади, деб қўшимча қилди вазирлик.

Жанубий Кореяга Е-9 визаси билан кирган муҳожирлар сони 2021 йилда 52 минг ва 2022 йилда 69 минг бўлган бўлса, жорий йилда 120 мингга етди.