1 январдан бошлаб Россия Федерациясига кўчиб келганлар рус тилини билишларини тасдиқлашлари керак

Бошқа мамлакатлардан Россия Федерациясига ихтиёрий равишда қайтиш давлат дастурининг иштирокчиси тилни билишини бир неча усул билан исботлаши мумкин. Бу, масалан, таълим тўғрисидаги ҳужжат. Гап 1991 йил 1 сентябрдан кейин Россия Федерациясида олинган ёки рус тили давлат тили бўлган мамлакатда олинган ёки СССР даврида олинган таълим ҳақида бормоқда.

Агар бундай ҳужжатлар бўлмаса, фуқаро суҳбат давомида тилни билиш даражаси аниқланадиган комиссиядан ўтади. Шунга кўра, агар комиссия хулосаси салбий бўлса, муҳожир ўз тил билимини ошириши керак бўлади.

Бироқ бу Қозоғистон, Украина, Молдова ва Беларус фуқаролари учун истисно қилинган. Бу мамлакатлардан келган ватандошлар Россияга қайтишда тилни билишларини исботлашлари шарт эмас. Бу мамлакатларда рус тилини яхши биладиганлар яшайди деб тахмин қилинади.

2006 йилда қабул қилинган хориждаги ватандошларнинг ихтиёрий равишда қайтиши бўйича давлат дастури бўйича 1,16 миллион киши Россияга қайтган.