5 ёшли ўғлини хавф остида қолдирган мигрант аёл судланди

Санкт-Петербургдаги 204-сонли участка судяси муҳожир аёл Моҳигул Жўраевани 5 ёшли ўғлининг соғлигига жиддий таҳдид солганликда айбдор деб топиб, ҳукм чиқарди.

Шимолий пойтахт судларининг Бирлашган матбуот хизмати хабарига кўра, аёл “Вояга етмаган шахсни хавф остида қолдириш” моддаси бўйича айбланди.

Жорий йилнинг апрель ойида Марказий Осиёдан келган Жўраевага вақтинчалик иш таклиф қилинган. Аммо 2017 йилда туғилган жажжи ўғлига қараб ўтирадиган одам бўлмаганидан уни хонасига қамаб кетишга қарор қилади.

Унинг йиғлаётганини эшитган қўшнилар полицияга қўнғироқ қилган ва онага нисбатан жиноий иш очилган. Болада жароҳатлар, жумладан, бошнинг ёпиқ жароҳати, кесилган яра ва бутун танасида кўкаришлар бўлган. Аёл ўз айбига иқрор бўлиб, озиқ-овқат йўқлиги ва ишлашдан бошқа иложи бўлмаганини тушунтирган.

Суд вазиятни ва онанинг олдинги судланмаганлигини, болани тарбиялашдаги ролини, шунингдек, иккинчи фарзандига ҳомиладорлигини ҳисобга олиб, 15 минг рубл миқдорида жаримага тортди. Шунингдек, васийлик органларига оилани назорат қилиш топширилди.