Ukrainada Rossiya uchun jang qilishni rejalashtirgan shaxsning ozodligi 3 yilga cheklandi

Qoraqalpog‘istonning Amudaryo tuman jinoyat ishlari bo‘yicha sudi Rossiya armiyasi safida Ukrainaga qarshi jang qilishni rejalashtirgan mahalliy fuqaroga nisbatan uch yillik ozodlikni cheklash jazosi tayinladi.

Ayblanuvchiga nisbatan hukm 24-iyun kuni chiqarilgan. Tergov maʼlumotlariga koʻra, Oʻzbekiston fuqarosi Rossiyaga ishlash uchun ketgan, u yerda Ukrainaga qarshi harbiy amaliyotlarda qatnashish uchun Rossiya Qurolli kuchlari bilan shartnoma tuzgan. Biroq, keyinroq urushga bormaslikka qaror qilib, vataniga qochib ketgan.

Sud ayblanuvchining voyaga yetmagan farzandi borligini va muqaddam sudlanmaganligini inobatga olib, ozodlikni cheklash jazosini tayinladi.