Politsiya o‘rmonda qoldirib ketgan o‘zbekistonlik yigit yovvoyi hayvonlarga yem bo‘lgan

Moskva viloyatida o‘zbekistonlik muhojirni o‘rmonga tashlab ketgan ikki politsiyachining ishi sudga oshirildi. May oyida politsiya muhojirni “shamollatish uchun” o‘rmonga olib borgan, sentyabrda esa uning yovvoyi hayvonlar tomonidan parchalab tashlangan jasadi topildi.

45 yoshli Oybek 19-may kuni Likino-Dulyovoda nomaqbul xatti-harakati uchun qo‘lga olingan. Politsiyaning iddaolariga ko‘ra, u o‘zini tajovuzkor tutgan, mast holatda bo‘lgan va davlat mulkiga zarar yetkazgan. Politsiya Oybekni Dubrovo va Zagryajskaya qishloqlari oralig‘idagi o‘rmonda tashlab ketishga qaror qilgan. Keyinchalik, ayrim manbalarga ko‘ra, politsiya muhojirni shunchaki unutib, uni nochor ahvolga solib qo‘ygan.

Oybek uyga qaytmaganidan so‘ng uning qarindoshlari bedarak yo‘qolganligi haqida ariza berishgan. Yaqinda uning jasadi yovvoyi hayvonlar yeb ketgan, bo‘laklarga bo‘lingan holda topilgan.

Muhojirning o‘limi ishi bo‘yicha Oybekni oxirgi bo‘lib ko‘rgan kichik leytenant va katta serjant qo‘lga olindi. Har ikki politsiyachi avvaliga ishdan bo‘shatilgan, keyin esa hibsga olingan. Hozirda ular mansab vakolatlarini suiiste’mol qilishda ayblanmoqda.

Bu voqea politsiya xodimlarining muhojirlar hayotiga qanchalik befarqligidan dalolat beradi. Ehtimol, ular Oybekni qaytarishni zarur deb bilishmagandir, chunki u yuqori martabali amaldorlarning qarindoshi bo‘lmagan va korrupsion politsiyachi uchun standart miqdor bo‘lgan besh ming rubl “to‘lov”ni to‘lash uchun hushyor holatda emas edi. O‘shanda mast Oybek politsiya xodimlarini qiziqtirmagan va shaxs sifatida qabul qilinmagan. Shuning uchun u insoniy tamoyillarni unutgan kimsalar tomonidan o‘rmonga tashlab ketildi.

Ushbu vaziyatdan kelib chiqqan holda, migrantlar spirtli ichimliklarni iste’mol qilmaslik, adekvatlikni saqlash zarurligini esga olishlari kerak. Vaziyatni har doim real baholash muhim: Rossiyadagi muhojirning hayoti ko‘pincha hech qanday qiymatga ega emas va sodir bo‘lgan fojia buni tasdiqlaydi.

Xavfsizlik qoidalariga rioya qilish kerak – spirtli ichimliklardan saqlaning, mojarolarga aralashmang, Rossiyaga nega kelganingiz, maqsadlaringizni eslang va hayotingizning qadriga yeting.