Россияда 100 дан ортиқ ўзбекнинг паспорти олиб қўйилиб, мажбурий меҳнатга жалб этилган

Россияда паспорти олиб қўйилиб, мажбурий меҳнатга жалб этилган бир гуруҳ ватандошларга ёрдам кўрсатилди.

Шу йил октябрь ойида бир неча Ўзбекистон фуқаролари Ташқи меҳнат миграция агентлигининг Екатеринбург шаҳридаги вакилига мурожаат қилишган. Бунга сабаб  Свердловск вилоятидаги «Рефтинская птицефабрика» корхонасида меҳнат қилаётган  ватандошларимизнинг фуқаролик паспортлари олиб қўйилиб, ойлик маош берилмай ишлатилаётгани бўлган.

Ўзбекистоннинг Екатеринбургдаги Бош консуллиги ходимлари  Ташқи меҳнат миграция агентлиги вакиллари билан ҳамкорликда Россиянинг Урал федерал округида мажбурий меҳнатга жалб этилган юртдошларимизнинг Ватанга қайтишларига кўмак кўрсатишгани ҳақида «Дунё» АА мухбири хабар берган.

Мурожаати асосида олиб борилган суриштирувларга кўра, жорий йилнинг сентябрь-октябрь ойларида Москва вилоятида рўйхатдан ўтган «Константа» МЧЖ 100 нафардан ортиқ юртдошларимизни Свердловск вилоятидаги йирик товуқ етиштириш  хўжалигига олиб келган. Мигрантлар Россияда вақтинча бўлиш ва ишлаш ҳуқуқини берувчи ҳужжатлар билан расмийлаштирилмасдан ишга жалб этилган.

Корхона раҳбарияти билан олиб борилган музокаралар натижасида 53 нафар ўзбекистонликнинг фуқаролик паспорти олиб берилди ҳамда уларга Ватанга етиб олишлари учун кўмак кўрсатилди. Қолганлар эса Екатеринбург, Москва ва бошқа шаҳарларида қонуний тарзда ўз фаолиятларини давом эттириш истакларини билдиришди.