Тожикистонлик мигрантлар Мариуполни тиклаш ишлари учун уларга маош беришмаётганидан шикоят қилмоқда

Россия қурилиш компаниялари томонидан   Мариуполни тиклаш учун юборилган тожик мигрантлари иш берувчилари уларга ваъда қилинган маошларни бермаётганини айтишди.

Тожикистонликларнинг кўпчилиги ўтган йилнинг октябрь-ноябрь ойларидан бери вайрон бўлган шаҳарда ишлаб келган. Бу ҳақда “Озодлик” радиосига таяниб, “УНН” нашри ёзмоқда.

Иқтибос

 “Ўтган ёздан бери Россиянинг бир қанча қурилиш компаниялари Тожикистондан келган мигрантларга вайрон бўлган Мариуполь шаҳрини қайта тиклаш ишларида пул ишлашни таклиф қилмоқда”, — дейилади хабарда.

Тожик мигрантларидан бири Сафарали 300 га яқин одам ваъда қилинган маошни ололмаётганларини айтди.

“Иш берувчилар ойига 120 минг рублгача тўлашни ваъда беришган. Дастлабки ойларда бизга ваъда қилинган миқдорнинг ярмидан кам маош олдик”, деди у.

Қайд этилишича, ўтган йилнинг декабрь ойида ҳам Мариуполдаги тожик мигрантлари  иш берувчилар уларга ваъда қилинган маошнинг ярмини тўлашини айтишган.

Тожикистон ҳукумати ўз фуқароларидан Украинанинг хавфли ҳудудларига бормасликни қайта-қайта сўраган.