O‘z vatandoshini urib pulini olib qo‘ygan ikki migrant qo‘lga tushdi

Politsiya o‘g‘irlik, talonchilik va tovlamachilikda gumon qilingan ikki nafar shaxsni qo‘lga oldi. Tafsilotlar Sankt-Peterburg va Leningrad viloyati Ichki ishlar vazirligi tomonidan ma’lum qilindi.

6-avgust kuni kechqurun Sankt-Peterburgga bir oy oldin kelgan Markaziy Osiyo davlatlaridan birining 28 yoshli fuqarosi Moskva tumani politsiyasiga murojaat qildi. Uning so‘zlariga ko‘ra, bir oy muqaddam “Kupchino” metro bekati yonida hamyurtini uchratgan. 5-avgust kuni soat 03:00 atrofida ular birgalikda Pulkovskoye shosse ko‘chasidagi 86-uy yonidagi bo‘sh yer uchastkasiga yarim kunlik ish uchun kelishgan. Oradan biroz vaqt o‘tgach, noma’lum shaxs avtomashinada ularning oldiga kelib, jabrlanuvchini kaltaklay boshlagan, so‘ngra ichida 25 ming rubl solingan sumka va 10 ming rubllik uyali telefonni olib ketgan. Shuningdek, jabrlanuvchining bank kartasini olib, PIN kodini berishga majburlab, hisob raqamidan 40 ming rublni yechib olishgan. Voqea sodir bo‘lganidan so‘ng huquqbuzarlar jabrlanuvchini uyiga olib ketishgan va sodir bo‘lgan voqeani hech kimga aytmaslik bilan qo‘rqitishgan.

Tixaya ko‘chasida ushbu jinoyatni sodir etishda gumon qilingan 28 va 32 yoshli ikki nafar muhojir qo‘lga olindi; ularning kattasi muqaddam bir necha marta sudlangan.

Politsiya tergovi Rossiya Federatsiyasi Jinoyat kodeksining 158-moddasi (o‘g‘irlik), Rossiya Federatsiyasi Jinoyat kodeksining 161 (talonchilik) va 163-moddasi (tovlamachilik) bo‘yicha bir vaqtning o‘zida uchta jinoiy ish qo‘zg‘atdi.