Қозоғистонда 2023 йилда хорижлик ишчиларни таклиф қилиш квотаси белгиланди

Қозоғистон Республикаси Меҳнат ва аҳолини ижтимоий муҳофаза қилиш вазирлиги ички меҳнат бозорини ҳимоя қилиш мақсадида ҳар йили иш берувчиларнинг эҳтиёжларидан келиб чиққан ҳолда Қозоғистонга хорижлик ишчи кучини жалб қилиш учун квота белгилайди ва тақсимлайди, деб хабар беради “Казинформ”.

2023 йилда умумий квота республикадаги ишчи кучига нисбатан 0,24% ёки 22,2 минг бирликни ташкил этди, деб хабар бермоқда Меҳнат ва аҳолини ижтимоий муҳофаза қилиш вазирлиги матбуот хизмати.

2023 йилда хорижлик ишчиларни жалб қилиш квотаси 4 тоифага бўлинган:

• биринчи тоифа учун 949 та рухсатнома (раҳбар ва уларнинг ўринбосарлари),
• иккинчи тоифа учун 5313 та рухсатнома (таркибий бўлинмалар раҳбарлари) ажратилган.

Рухсатномаларнинг асосий қисми учинчи (мутахассислар) ва тўртинчи (малакали ишчилар) тоифаларига тегишли бўлиб, мос равишда 10 818 ва 2 100 бирликни ташкил этади.

Шунингдек 3080 нафаргача киши мавсумий ишларга жалб этилиши мумкин.

Бундан ташқари, 2023 йил учун меҳнат мигрантларини уй хўжаликларида ишлашга жалб қилиш квотаси республикадаги ишчи кучига нисбатан 3,2%  ёки 296,7 минг бирликни ташкил этади.

Эслатиб ўтамиз, 2022 йилда маҳаллий ижро этувчи ҳокимият органлари томонидан иш берувчиларга чет эллик ишчи кучини жалб қилиш учун 13,4 мингта рухсатнома берилди ва узайтирилди, бу қайта тақсимланган квотанинг (21,1 мингта) 63,5 фоизини ташкил этди.

Ҳозирда Қозоғистон ҳудудида маҳаллий ижро ҳокимияти органлари рухсатномалари бўйича 13 951 нафар чет эл фуқароси меҳнат қилмоқда.

2022 йилда меҳнат мигрантларини уй хўжаликларида ишлашга чақириш квотаси 300 минг бирлик қилиб белгиланди.

Маҳаллий ижро этувчи ҳокимият органлари томонидан 272 002 та рухсатнома берилди.