Soxta “migrantlar to‘dasi” o‘smirlar janjaliga aybdor deb topildi

Sankt-Peterburgda maktab o‘quvchilarining o‘zaro janjali tufayli soxta xabarlar paydo bo‘lib, Rossiya hukumati muhojirlarni jinoiy guruhlar yaratishda ayblashga shoshildi. Politsiya tarqalgan videoda qayd etilgan voqea shunchaki o‘smirlar o‘rtasidagi uch oy ilgari bo‘lgan janjal ekanligini aniqladi.

RIA Novosti xabariga ko‘ra, videoga tushib qolgan mushtlashuvga bir qiz sabab bo‘lgan va uning ham muhojirlarga hech qanday aloqasi bo‘lmagan. Videoda ko‘rsatilgan qurol esa “Magnit” do‘konidan mojaro ishtirokchilaridan biri tomonidan sotib olinib, politsiyaga topshirilgan.

Shunga qaramay, “migrantlar to‘dasi” haqidagi soxta xabarlar tezda ijtimoiy tarmoqlarda tarqalib, migrantlarga qarshi kayfiyatni kuchaytirdi va muhojirlarga nisbatan yolg‘on ayblovlarni keltirib chiqardi. Voqea ishtirokchilari – o‘smirlar bundan hayron bo‘lib, mojaro allaqachon hal bo‘lganini aytgan. Politsiya ular va ota-onalari bilan profilaktik suhbat o‘tkazib, millatiga ko‘ra jinoiy guruh yo‘qligini ta’kidladi.

Bu holat noto‘g‘ri ma’lumotlarning tarqalishi qanchalik tez jamoatchilik fikriga ta’sir qilishi va asossiz ayblovlarga olib kelishi mumkinligini ko‘rsatadi.

Mazkur voqea bo‘yicha Rossiya hukumati muhojirlar haqidagi stereotiplarni mustahkamlab, soxta ma’lumotlar asosida tergov boshladi, vaholanki, aslida mojaro uyushgan jinoyatchilik yoki migrantlar bilan bog‘liq bo‘lmagan oddiy o‘smirlar janjali bo‘lib chiqdi.

Politsiya xodimlari o‘smirlar va ularning ota-onalari bilan profilaktik suhbat o‘tkazdi. Materiallar qo‘shimcha tekshirish uchun Tergov qo‘mitasiga topshiriladi.