U Rossiyaga ishlash uchun ketib, tobutda qaytdi

Moskvada o‘ldirilgan 30 yoshli Jamila Nurzodning jasadi vatani – Tojikistonga olib kelindi.

Ozodi radiosiga ko‘ra, qotillikda rossiyalik 49 yoshli Vladimir Upadishev gumon qilinmoqda. Moskva sudi uni 6 oktyabr kuni hibsga oldi.

Tergovchilarning aytishicha, 21-sentyabr kuni erkak Jamiladan uyini tozalashni so‘ragan. Uyning o‘ta iflosligi sababli ayol ishdan bosh tortdi. Xonadon egasi uni kaltaklay boshlagan, yuzi va tanasiga otvyortka bilan urgan. Jamila hushidan ketgach, izlarni yo‘qotish uchun qotil uyga o‘t qo‘yib qochib ketgan. Qo‘shnilar tutunni payqab, o‘t o‘chirish xizmatini chaqirgan. Jamila shifoxonaga yetkazilgan, biroq u olgan jarohatlaridan vafot etdi.

Taxminlarga ko‘ra, erkak uni zo‘rlamoqchi bo‘lgan. Ayol rozi bo‘lmaganidan so‘ng qotillik sodir etilgan.

Jamila Moskvadagi kafelardan birida ishlagan va yolg‘iz yashagan. U Tojikistondagi o‘g‘li yetim bo‘lib qoldi.

Afsuski, bunday hodisalar ko‘plab uchraydi.

2022-yilda besh yoshli tojikistonlik Daler Bobiyev o‘ldirilgan; uning jasadi olti oydan keyin topildi. 2018-yilda Moskva viloyatida besh yoshli Huvaydo Tillozoda zo‘rlanib, o‘ldirilgan edi. Uzoq davom etgan sud jarayonlaridan so‘ng jinoyatchi Rossiya fuqarosi umrbod qamoq jazosiga hukm qilindi.

Crocus City Halldagi teraktdan keyin Rossiyada muhojirlarga munosabat yanada yomonlashdi. Qonunlar kuchaytirildi va yangiliklar tobora ko‘proq faqat chet elliklar ishtirokidagi jinoyatlarga qaratilmoqda.

Ayni paytda, muhojirlarning o‘zlari o‘ldirilgan holatlar ko‘pincha e’tibordan chetda qoladi va muhokama qilinmaydi. Rasmiy ma’lumotlarga ko‘ra, joriy yilning olti oyida Rossiyadan Tojikistonga 600 dan ortiq muhojir jasadi olib kelingan.